Gemstone Numerology: तुमची जन्मतारीख काय? मूलांकावरुन ‘हे’ रत्न धारण करा; उत्तम शुभ-लाभ मिळवा

Gemstone Numerology: एखादे रत्ने धारण करण्यापूर्वी विशिष्ट दिवस, शुभ मुहूर्त पाहिला जातो, असे सांगितले जाते.

एखाद्या व्यक्तीच्या जन्मदिनांकानुसार त्याचा मूलांक काढला जातो आणि त्या मूलांकाच्या आधारे माणसाचा स्वभाव, त्याची गुणवैशिष्ट्ये सांगता येऊ शकतात. ज्योतिषशास्त्राच्या अनेक शाखा आहेत. त्यापैकी एक म्हणजे अंक ज्योतिष. भविष्यकथनात कुंडली, हस्तरेषा, चेहरा, नाडीपरीक्षा यांच्या इतकेच महत्त्व संख्याशास्त्र किंवा अकंशास्त्राच्या माध्यमातून सांगितल्या जाणाऱ्या भविष्यालाही आहे.

दुसरे म्हणजे, एखाद्या व्यक्तीला अमूक एका ग्रहाची महादशा सुरू असेल किंवा कामातील समस्या तसेच अडचणी वाढत असतील, तर नवरत्नांपैकी एखादे रत्न धारण करण्याचा, परिधान करण्याचा सल्ला दिला जातो. काही रत्ने अंगठी, तर काही रत्ने लॉकेटच्या माध्यमातून धारण केली जातात. (Gemstone Numerology)

ही रत्ने धारण करण्यापूर्वी विशिष्ट दिवस, शुभ मुहूर्त पाहिला जातो, असे सांगितले जाते. ज्योतिषशास्त्रात व्यक्तीच्या जन्मकुंडलीचा अभ्यास करून रत्न धारण करण्याचा सल्ला दिला जातो. तसाच तो अंक ज्योतिषाचा अभ्यास करूनही दिला जातो. ज्योतिषशास्त्र, अंक ज्योतिष आणि रत्नशास्त्र या तीनही गोष्टींचा तुलनात्मक अभ्यास करून एखाद्या व्यक्तीने नवरत्नांपैकी कोणते रत्न धारण करावे? जन्मदिनांकानुसार रत्न धारण केल्याचा काय लाभ मिळू शकतो? कोणत्या मूलांकाच्या व्यक्तीला कसा फायदा होऊ शकतो? जाणून घेऊया...

मूलांक १ - ज्या व्यक्तींचा जन्म १, १०, १९ आणि २८ या तारखांना झाला असल्यास त्यांचा मूलांक एक येतो. नवग्रहांचा राजा सूर्य मूलांक १ चा स्वामी असल्याचे सांगितले जाते. ज्या व्यक्तींचा मूलांक एक आहे, त्यांच्यासाठी पुष्कराज आणि पिवळा किंवा हिरवा तृणमणी (कहरुआ) शुभ असल्याचे सांगितले जाते. हे रत्न अंगठी किंवा लॉकेटच्या माध्यमातून ते त्वचेला स्पर्श करेल, अशा प्रकारे बनवून घ्यावे आणि ज्योतिषाच्या सल्ल्यानुसार योग्य दिवशी मंत्रवून धारण करावे, असे सांगितले जाते.

मूलांक २ - ज्या व्यक्तींचा जन्म २, ११, २० आणि २९ या तारखांना झाला आहे, त्या व्यक्तींचा मूलांक दोन येतो. चंद्र हा मूलांक २ चा स्वामी मानला जातो. ज्या व्यक्तींचा मूलांक दोन आहे, अशा व्यक्तींसाठी मोती, चंद्रमणी आणि पिवळ्या, हिरव्या रंगाचे रत्न शुभ असल्याचे सांगितले जाते. या व्यक्तींचा मनोरंजन आणि कला क्षेत्राकडे अधिक कल असतो. वरीलपैकी रत्न धारण केल्यास कार्यक्षेत्रात उत्तम प्रकारे लाभ आणि फायदा दोन्ही मिळू शकते, असे सांगितले जाते.

मूलांक ३ - ज्या व्यक्तींचा जन्म ३, १२, २१ आणि ३० या तारखांना झाला असेल, तर त्या व्यक्तींचा मूलांक तीन असतो. मूलांक ३ वर गुरुचे स्वामीत्व असल्याचे मानले जाते. ज्या व्यक्तींचा मूलांक तीन आहे, अशा व्यक्तींकडे उत्तम नेतृत्व गुण असतात. बड्या कंपन्या, संस्थांमध्ये अशा व्यक्ती नेहमी उच्च पदावर कार्यरत असतात. अशा व्यक्तींसाठी नीलमणी आणि बिल्लोर रत्न शुभ असल्याचे सांगितले जाते.

मूलांक ४ - ज्या व्यक्तींचा जन्म ४, १३, २२ आणि ३१ या तारखांना झाला असेल, तर त्या व्यक्तींचा मूलांक चार असतो. राहु ग्रहाचे मूलांक ४ वर स्वामित्व असल्याचे सांगितले जाते. ज्या व्यक्तींचा मूलांक ४ आहे, अशा व्यक्तींसाठी गडद रंगाचे नीलम रत्न शुभ असल्याचे सांगितले जाते. हे रत्न अंगठी किंवा लॉकेटच्या माध्यमातून ते त्वचेला स्पर्श करेल, अशा प्रकारे बनवून घ्यावे. हे रत्न धारण करण्यापूर्वी योग्य सल्ला अवश्य घ्यावा, असे सांगितले जाते.

मूलांक ५ - ज्या व्यक्तींचा जन्म ५, १४ आणि २३ या तारखांना झाला असेल, त्या व्यक्तींचा मूलांक पाच येतो. नवग्रहांमध्ये राजकुमार मानला गेलेला बुद्धिकारक बुध या मूलांकाचा स्वामी ग्रह आहे. ज्या व्यक्तींचा मूलांक पाच आहे, त्या व्यक्तींसाठी हिरा शुभ मानला गेला आहे. हिरा धारण करताना तो चांदी किंवा प्लॅटिनममध्येच धारण करावा, असे सांगितले जाते.

मूलांक ६ - ज्या व्यक्तींचा जन्म ६, १५ आणि २४ या तारखांना झाला असेल, त्या व्यक्तींचा मूलांक सहा असतो. मूलांक ६ वर भौतिक सुखांचा कारक असलेल्या शुक्र ग्रहाचे स्वामीत्व असते, असे मानले जाते. मूलांक सहा असलेल्या व्यक्तींचे व्यक्तिमत्त्व आकर्षक असल्याचे सांगितले जाते. ज्या व्यक्तींचा मूलांक सहा आहे, त्या व्यक्तींसाठी फिरोजा आणि पाचू ही रत्ने अत्यंत शुभ असल्याचे मानले जाते. कार्यक्षेत्रात यामुळे लाभ आणि फायदा मिळू शकतो, असे सांगितले जाते.

मूलांक ७ - ज्या व्यक्तींचा जन्म ७, १६ आणि २५ या तारखांना झाला आहे, त्या व्यक्तींचा मूलांक सात असतो. मूलांक ७ हा समुद्राचे प्रतिनिधित्व करतो, असे मानले जाते. या मूलांकाचा स्वामी केतु असून, सामावून घेणे आणि सक्षमता हे प्रमुख गुण मूलांक सात असलेल्या व्यक्तींमध्ये असतात, अशी मान्यता आहे. ज्या व्यक्तींचा मूलांक सात आहे, त्या व्यक्तींसाठी चंद्रमणी आणि मोती ही दोन रत्ने अत्यंत शुभ असल्याचे सांगितले जाते.

मूलांक ८ - ज्या व्यक्तींचा जन्म ८, १७ आणि २६ तारखेला झाला असेल, तर त्या व्यक्तींचा मूलांक आठ येतो. मूलांक ८ वर शनीचे स्वामीत्व असते, अशी मान्यता आहे. शनी न्यायाची देवता मानली जाते. जैसे ज्याचे कर्म, तैसे त्याला फळ, या न्यायाने शनी त्या त्या व्यक्तींना लाभ देत असतो. ज्या व्यक्तींचा मूलांक आठ आहे, त्या व्यक्तींसाठी नीलमणी, नीलम, काळा हिरा किंवा मोती अशी चार रत्ने शुभ असल्याचे सांगितले जाते.

मूलांक ९ - ज्या व्यक्तींचा जन्म ९, १८ आणि २७ या तारखांना झाला असल्यास त्या व्यक्तींचा मूलांक नऊ असतो. मूलांक ९ वर अग्नितत्त्व असलेल्या मंगळ ग्रहाचे स्वामीत्व असल्याचे मानले जाते. मेहनतीच्या जोरावर प्रगती करणे वा यश संपादन करणे, या व्यक्तींना आवडते. मूलांक नऊ असलेल्या व्यक्तींसाठी रुबी, गार्नेट आणि लाल रंगाचे रत्न शुभ असल्याचे सांगितले जाते.