भारतीयांचा डंका; मायक्रोसॉफ्ट, गुगलपाठोपाठ आयबीएमच्या प्रमुखपदीही भारतीय व्यक्ती

गेल्याच आठवड्यात अरविंद कृष्णा यांची आयबीएमच्या मुख्य कार्यकारी अधिकारी पदावर नियुक्ती झाली. ५७ वर्षांचे कृष्णा ६ एप्रिलपासून पदभार स्वीकारतील.

चेन्नईत जन्मलेले सुंदर पिचाई सध्या गुगलचे सीईओ आहेत. ऑगस्ट २०१५ पासून ते गुगलचं नेतृत्व करत आहेत. त्याआधी त्यांनी गुगल टूलबार आणि गुगल क्रोमवर काम केलं आहे.

सत्या नडेला १९९२ पासून मायक्रोसॉफ्टमध्ये कार्यरत आहेत. फेब्रुवारी २०१४ पासून ते मायक्रोसॉफ्टचे सीईओ म्हणून काम करत आहेत. बिल गेट्स, स्टीव्ह बाल्मेर यांच्यानंतर मायक्रोसॉफ्टची धुरा नडेला यांच्याकडे सोपवण्यात आली.

हैदराबादमध्ये जन्मलेले शंतनू नारायण १९९८ पासून अ‍ॅडोबमध्ये काम करत आहेत. २००५ मध्ये त्यांच्याकडे सीओओ पदाची जबाबदारी देण्यात आली. त्यानंतर दोनच वर्षात त्यांची सीईओपदी नियुक्ती झाली.

अजयपाल सिंग बग्गा २०१० पासून मास्टरकार्डचे सीईओ म्हणून काम करत आहेत. त्याआधी ते सिटी ग्रुप आशिया पॅसिफिकचे सीईओ होते. त्यांनी नेसले आणि पेप्सिकोतही वरिष्ठ पदांवर काम केलं आहे.

दिल्लीत जन्मलेले राजीव सुरी मे २०१४ पासून नोकियाच्या सीईओपदी आहेत. त्याआधी ते नोकिया सोल्युशन्सचे सीईओ होते. त्यांनी नोकियामध्ये विविध पदांवर काम केलं आहे.

फ्रान्सिस्को डिसुझा यांनी २००७ मध्ये कॉग्निझंटच्या सीईओ पदाची सूत्रं स्वीकारली. त्यावेळी कंपनीचं महसुली उत्पन्न २.१ बिलियन अमेरिकन डॉलर होतं. २०१८ मध्ये ते १६.१ मिलियन अमेरिकन डॉलरवर पोहोचलं.