PM Kisan : शेतकऱ्यांची नवीन लिस्ट तयार होणार; आता 'या' लोकांना मिळणार नाहीत 2000 रुपये

PM Kisan Samman Nidhi Social Audit : पीएम किसान सन्मान निधी योजनेशी संबंधित नवीन माहिती समोर येत आहे. अनेक अपात्र लोकही किसान सन्मान निधीचा लाभ घेत असल्याची बातमी सरकारला मिळाली आहे.

नवी दिल्ली : पीएम किसान सन्मान निधी योजनेचे (PM Kisan Samman Nidhi) 12.50 कोटी लाभार्थी 11व्या हप्त्याच्या प्रतीक्षेत आहेत. 11 वा हप्ता कधी येणार याबाबत सरकारकडून कोणतीही अधिकृत माहिती देण्यात आलेली नाही. परंतु एप्रिल ते जुलै दरम्यान 11 वा हप्ता येणे अपेक्षित आहे.

दरम्यान, पीएम किसान सन्मान निधी योजनेशी संबंधित नवीन माहिती समोर येत आहे. अनेक अपात्र लोकही किसान सन्मान निधीचा लाभ घेत असल्याची बातमी सरकारला मिळाली आहे. अशा परिस्थितीत योजनेचा लाभ घेतलेल्या सर्वांची पडताळणी केली जाईल.

1 मे ते 30 जून या कालावधीत सोशल ऑडिट होणार

पीएम किसान सन्मान निधी योजनेसाठी 1 मे ते 30 जून दरम्यान सोशल ऑडिट करण्यात येत आहे. या ऑडिटमध्ये ग्रामसभेच्या माध्यमातून पात्र व अपात्र लोकांची माहिती गोळा केली जाणार आहे. याबाबतचा आदेश कृषी विभागाचे अतिरिक्त मुख्य सचिव डॉ. देवेश चतुर्वेदी यांनी जारी केला आहे.

ग्रामसभा यादी पाहून अपात्रांची माहिती देईल

उत्तर प्रदेश सरकारने सर्व जिल्ह्यांच्या डीएम, सीडीओ आणि उप कृषी संचालकांना पत्र पाठवले आहे. सरकारने पाठविलेल्या पत्रानुसार योजनेचा लाभ घेणाऱ्यांची यादी पाहून अपात्रांची माहिती ग्रामसभेमार्फत दिली जाईल. यासोबतच वंचित पात्र लाभार्थ्यांची ओळख पटवली जाईल.

अपात्रांची नावे काढून पात्रांची नावे जोडली जाणार

अपात्रांची नावे यादीतून काढून टाकली जातील आणि पात्र लोकांची नावे जोडली जातील. मृत व्यक्ती, एकाच कुटुंबातून दुहेरी लाभ घेणाऱ्यांची नावेही लाभार्थ्यांच्या यादीतून वगळण्यात येणार आहेत.

सोशल ऑडिट करण्यासाठी प्रत्येक जिल्ह्यात जिल्हाधिकाऱ्यांच्या अध्यक्षतेखाली सहा सदस्यीय समिती स्थापन करण्याच्या सूचना देण्यात आल्या आहेत. या समितीमध्ये मुख्य विकास अधिकारी, उप कृषी संचालक, जिल्हा विकास अधिकारी, एसडीएम आणि जिल्हा कृषी अधिकारी हे सदस्य असतील.

ई-केवायसीची मुदत वाढवली

दरम्यान, केंद्र सरकारने ई-केवायसी (eKYC) प्रक्रिया पूर्ण करण्यासाठी विहित मुदत वाढवली आहे, जी या योजनेअंतर्गत लाभ मिळवण्यासाठी अनिवार्य करण्यात आली आहे. पीएम किसान पोर्टलवरील अद्ययावत माहितीनुसार, आता ही प्रक्रिया 22 मे 2022 पर्यंत पूर्ण केली जाऊ शकते. यापूर्वी अंतिम तारीख 31 मार्च 2022 होती.

रेशनकार्डही अनिवार्य

सरकारने केलेल्या मोठ्या बदलांतर्गत आता या योजनेसाठी नवीन नोंदणी करताना रेशनकार्ड क्रमांक देणे बंधनकारक होणार आहे. याशिवाय दस्तऐवजाची पीडीएफ प्रतही ऑनलाइन पोर्टलवर अपलोड करावी लागेल. जर तुम्ही पीएम किसान योजनेंतर्गत पहिल्यांदा नोंदणी केली असेल तर अर्जदारासाठी रेशन कार्ड नंबर अपलोड करणे खूप महत्वाचे असेल.

आधार कार्ड, बँक पासबुक आणि घोषणापत्राच्या हार्ड कॉपी सादर करणे बंधनकारक करण्यात आले आहे. जर तुम्ही हे काम अजून केले नसेल तर आजच करा. असे करण्यात अयशस्वी झाल्यास तुमच्या हप्त्याची रक्कम मिळण्यात समस्या निर्माण होऊ शकतात.