Ranya Rao : दुबईहून दरवेळी १५ किलो सोनं आणून किती कमाई करायची रान्या राव?, झाला धक्कादायक खुलासा

Ranya Rao Gold Smuggling Case : दुबईहून मोठ्या प्रमाणात सोन्याची तस्करी करण्याचा प्रयत्न करताना महसूल गुप्तचर संचालनालयाने (DRI) तिला पकडलं.

प्रसिद्ध कन्नड चित्रपट अभिनेत्री रान्या राव हिचं नाव सध्या एका मोठ्या सोनं तस्करी प्रकरणात समोर आलं आहे. दुबईहून मोठ्या प्रमाणात सोन्याची तस्करी करण्याचा प्रयत्न करताना महसूल गुप्तचर संचालनालयाने (DRI) तिला पकडलं.

रान्याने यापूर्वीही अनेकदा तस्करी केली होती, असं सांगितलं जात आहे. परंतु यावेळी एजन्सीकडे ठोस माहिती होती. डीआरआयच्या या कारवाईमुळे सोन्याच्या तस्करीत सहभागी असलेल्या इतर अनेक नावांवरही प्रश्नचिन्ह उपस्थित झाले आहे.

या रॅकेटशी संबंधित आणखी लोकांची ओळख पटवली जात असून लवकरच अनेक मोठे खुलासे होऊ शकतात, असं तपास यंत्रणांचं म्हणणं आहे.

अभिनेत्रीने २०१४ मध्ये 'माणिक्य' या कन्नड चित्रपटातून पदार्पण केलं आणि नंतर 'वगाह' आणि 'पटकी' सारख्या चित्रपटांमध्ये काम केलं, परंतु अचानक ती इंडस्ट्रीतून गायब झाली.

मिळालेल्या माहितीनुसार, रान्याने दुबईमध्ये आपलं नवीन घर बनवलं आणि तेथे राहण्यासाठी ओळखपत्र देखील मिळवलं. चित्रपटांमधून गायब झाल्यानंतर ती बेकायदेशीर कृत्य करू लागली.

भारत आणि दुबईमधील सोन्याच्या किमतीतील फरकाचा फायदा घेण्यासाठी तिने सोन्याच्या तस्करी करणाऱ्या गँगशी हातमिळवणी केली आणि तस्करी सुरू केल्याचं सांगण्यात येत आहे.

भारतात सोन्याची किंमत दुबईपेक्षा खूपच जास्त आहे. कस्टम ड्यूटी न भरता भारतात सोनं आणून तस्कर मोठा नफा कमावतात.

डीआरआयच्या सूत्रांनुसार, रान्या राव एका वेळी सुमारे १५ किलो सोने आणत असे, ज्यामुळे तिला सुमारे ५० लाख रुपयांचा थेट नफा मिळत असे. गेल्या काही महिन्यांत अभिनेत्रीने असं अनेक वेळा केलं.

असा आरोप आहे की तिने विमानतळ सुरक्षा नियमांपासून दूर राहण्यासाठी तिच्या वडिलांच्या प्रतिष्ठेचा वापर केला, परंतु यावेळी डीआरआयने तिच्या हालचालींवर लक्ष ठेवले आणि अखेर तिला पकडलं.

अटकेनंतर रान्याने स्वतःला वाचवण्यासाठी अनेक मोठे नेते आणि मंत्र्यांची मदत घेतली, परंतु डीआरआयकडे भक्कम पुरावे होते. त्यामुळे तिला अटक करण्यात आली आहे.