अजय देवगणचा दबदबा कायम, 'हे' बहुप्रतीक्षित बॉलिवूड चित्रपट येणार प्रेक्षकांच्या भेटीला!

'सिंघम अगेन'नंतरही अजय देवगणचा बॉक्स ऑफिसवर दबदबा कायम राहणार आहे.

अभिनेता अजय देवगण हा एक लोकप्रिय अभिनेता आहे. सध्या अजय हा दिग्दर्शक रोहित शेट्टीच्या 'सिंघम अगेन' या ॲक्शन थ्रिलर चित्रपटामुळे चर्चेत आहे. त्याचा हा चित्रपट बॉक्स ऑफिसवर दमदार कमाई करत आहे.

'सिंघम अगेन'नंतरही अजय देवगणचा बॉक्स ऑफिसवर दबदबा कायम राहणार आहे. कारण, अक्षयचे बहुप्रतिक्षित चित्रपट प्रेक्षकांच्या भेटीला येणार आहेत.

अजयच्या अ‍ॅक्शन, थ्रिलर, कॉमेडी आणि ड्रामा यांसारख्या चित्रपटांची मेजवानी प्रेक्षकांना मिळणार आहे. हे कोणते सिनेमे आहेत आणि कधी प्रदर्शित होणार आहेत, ते जाणून घेऊया.

अजय देवगण नवीन वर्षाची सुरुवात दिग्दर्शक अभिषेक कपूर दिग्दर्शित 'आझाद' या चित्रपटाने करणार आहे. या ॲक्शन जॉनर सिनेमाद्वारे अजयचा पुतण्या अमन देवगण आणि रवीना टंडनची मुलगी राशा थडानी फिल्मी दुनियेत पदार्पण करणार आहेत. नुकताच आझादचा एक जबरदस्त टीझर रिलीज झाला आहे.

पहिल्या भागाच्या अफाट यशानंतर निर्माता लव रंजन रोमँटिक कॉमेडी 'दे दे प्यार दे'चा सीक्वल घेऊन येत आहे. अजय देवगण आणि रकुल प्रीत यांची प्रमुख भूमिका असलेला हा चित्रपट पुढील वर्षी 1 मे रोजी मोठ्या पडद्यावर प्रदर्शित होणार आहे.

2018 मध्ये रिलीज झालेल्या अजय देवगणच्या क्राइम ड्रामा 'रेड'चा सिक्वेल म्हणजेच 'रेड 2' लवकरच प्रेक्षकांच्या भेटीला येणार आहे. हा सिनेमा पुढील वर्षी प्रदर्शित होण्याची शक्यता आहे.

अजय देवगणचा 'सन ऑफ सरदार' (Son Of Sardar) सिनेमा चांगलाच हिट झाला होता. 2012 साली आलेल्या या सिनेमाने प्रेक्षकांना खळखळून हसवलं. सिनेमाची गोष्ट, गाणी सगळंच अफलातून होतं. आता तब्बल 12 वर्षांनी सिनेमाचा सीक्वेल येणार आहे.

दिग्दर्शक रोहित शेट्टीसोबत अजय देवगणही आगामी काळात बॉक्स ऑफिसवर धमाल करताना दिसणार आहे. अलीकडे, रणवीर अलाहाबादियाच्या पॉडकास्ट दरम्यान, रोहितने 'गोलमाल 5' येणार असल्याचे सांगितले.

2024 मध्ये अजय देवगणने हॉरर थ्रिलर 'शैतान' सिनेमाने बॉक्स ऑफिस गाजवलं. आता 'शैतान २'देखील येणार असल्याची चर्चा आहे. यासोबतच पहिल्या दोन भागांच्या बंपर यशानंतर 'दृश्यम 3'देखील येणार असल्याचे बोलले जात आहे. पण, याबाबत अधिकृत माहिती समोर आलेली नाही.