Corona Side Effects: कोरोना होऊन गेल्यानंतर होतोय 'हा' गंभीर आजार, वैद्यकीय तज्ज्ञही चिंतेत

कोरोनाचा जोर ओसरला असला तरी कोरोनामुळे होणाऱ्या आजारांचे प्रमाण वाढले आहे. कोरोनामुळे होणाऱ्या आजारात हार्ट अटॅकचेही प्रमाण जास्त आहे.

कोरोनाचा प्रभाव ओसरत चालला असला तरी त्याच्या दुष्परिणामांची चर्चा अजूनही सुरू आहे. कोरोना होऊन गेलेल्यांना त्यानंतरही त्याचा त्रास जाणवत होता. अनेकांमध्ये हृदयविकार बळावल्याचे निदर्शनास आले आहे.

कोरोनातून बरे झालेल्या रुग्णांमध्ये हृदयाच्या ठोक्यांत वाढ झाल्याचे आढळले आहे.

त्यामुळे हृदयविकारांत वाढ होऊन टॅचिकार्डिया नावाचा आजार बळावल्याचे निदर्शनास आले आहे.

हृदयाच्या ठोक्यांत प्रमाणापेक्षा वाढ होण्याच्या स्थितीला टॅचिकार्डिया असे संबोधले जाते. हृदयाला रक्तपुरवठा करणाऱ्या धमन्यांत ही स्थिती आढळून येते.

कोरोनापूर्व स्थितीत ज्या लोकांना कामाचा तणाव जाणवत होता त्यांच्यात कोरोनातून बरे झाल्यावर हृदयविकारांत वाढ झाल्याचे दिसले.

कोरोनातून बरे झाल्यावर हार्ट ॲटॅकची जोखीम तीन  ते आठ टक्क्यांनी वाढल्याचे निदर्शनास आले आहे. लॅन्सेटच्या संशोधन अहवालात ही माहिती देण्यात आली आहे.

८७ हजार लोकांवर यासंदर्भात अभ्यास करण्यात आला. त्यात ५७ टक्के महिलांमध्ये कोरोनातून बरे झाल्यावर रक्तात गुठळ्या निर्माण होणे आणि हृदयविकाराचा झटका येण्याचा धोका वाढण्याचे संकेत आढळून आलेे.

या लक्षणांकडे  करू नका दुर्लक्ष : छातीत सतत धडधडणे, चक्कर येणे, अस्वस्थ वाटणे, कमालीचा थकवा येणे, श्वसनात अडचणी 

हृदयविषयक कोणताही त्रास जाणवल्यास तातडीने ईसीजी वा ईको चाचणी करून घेण्याचा सल्ला वैद्यकीय तज्ज्ञांनी दिला आहे.

कोरोनातून बरे झालेल्या प्रत्येकाने ठरावीक अंतराने शारीरिक तपासण्या करून घेणे केव्हाही चांगले, असेही तज्ज्ञांचे म्हणणे आहे.