Corona Virus : चिमुकल्यांना विळखा! 12 वर्षांखालील मुलांवर अटॅक करतोय कोरोना; तज्ज्ञांनी व्यक्त केली चिंता

Corona Virus : 12 वर्षांखालील मुलांना व्हायरसची लागण होण्याचे प्रमाण वाढले आहे. ही प्रकरणे बहुतेक सौम्य आहेत.

देशात कोरोनाच्या रुग्णांमध्ये वाढ होत आहे. दरम्यान, दिल्लीत 12 वर्षांखालील मुलांना व्हायरसची लागण होण्याचे प्रमाण वाढले आहे. ही प्रकरणे बहुतेक सौम्य आहेत. डॉक्टरांनी लठ्ठपणा, दमा आणि इतर रोगप्रतिकारक स्थितींनी ग्रस्त असलेल्या मुलांच्या पालकांना लक्षणांकडे दुर्लक्ष करू नये असा इशारा दिला आहे.

रुग्णालयांमधील चाइल्ड ओपीडीमध्ये कोविड सारखी लक्षणे असलेल्या मुलांची संख्या वाढली आहे. डॉक्टरांचे म्हणणे आहे की एडेनो व्हायरस (कोविड प्रमाणेच) असलेल्या दोन वर्षांखालील मुलांचे रुग्णालयात दाखल होण्याचे प्रमाणही वाढले आहे.

डॉक्टरांच्या मते, एडेनो व्हायरस आणि कोरोना व्हायरसमध्ये खूप सूक्ष्म फरक आहे. डॉक्टरांचे म्हणणे आहे की सामान्य सर्दी/ताप/एडेनो व्हायरस आणि कोविड-19 मधील फरक चाचण्यांशिवाय कळणे कठीण आहे.

डॉ. राहुल नागपाल, फोर्टिस हॉस्पिटल, वसंत कुंज येथील बाल रोग, एचओडी, म्हणाले की कोविड सारखी लक्षणे असलेली किमान 10 मुले दररोज त्यांच्या ओपीडीमध्ये येत आहेत. यापैकी 2-3 होम टेस्ट (अँटीजेन सेल्फ टेस्ट) सह कोविड पॉझिटिव्ह आढळले.

डॉक्टर म्हणतात की लक्षणे आढळल्यास आम्ही सर्व पालकांना आरटी-पीसीआर चाचणीची शिफारस करतो. ते म्हणाले की बहुतेक पालक असे करण्यास तयारी दाखवत नाही कारण मुलांना ते अस्वस्थ वाटते.

एक वर्षापेक्षा कमी वयाच्या लहान मुलांना, कधीकधी संसर्ग झाल्यास रुग्णालयात दाखल करावे लागते, परंतु या वयोगटातील मुलांना सौम्य वेदना आणि ताप असतो. ते एक किंवा दोन दिवसात बरे होतात असं डॉक्टरांनी म्हटलं आहे.

ताप, नाक वाहणे आणि खोकला ही मुलांमध्ये आजाराची लक्षणे आहेत. ताप दोन-तीन दिवसांत उतरतो. तथापि, खोकला 2-3 आठवडे टिकतो. सामान्य आणि निरोगी मुलांमध्ये निमोनिया सहसा दिसत नाही.

डॉ.नागपाल म्हणाले की, दमा आणि स्टेरॉईड किंवा किडनीच्या आजारासह इतर आजारांनी ग्रस्त बालके समोर येत आहेत. त्याचबरोबर ल्युकेमियाने त्रस्त मुलांमध्ये छातीत जंतुसंसर्गाची प्रकरणे दिसून येत आहेत. तज्ज्ञांचे म्हणणे आहे की मुलांनी शाळेत मास्क घालायला सुरुवात करावी.

यूपीच्या बिजनौर येथील बाल विशेषज्ञ विपिन एम वशिष्ठ, ज्यांच्या ट्विटर हँडलने दावा केला आहे की जागतिक आरोग्य संघटनेने एडेनो व्हायरसची लक्षणे असलेल्या मुलांची प्रकरणे नोंदवली आहेत. तथापि, त्यांनी त्याला पीडियाट्रिक कोविड म्हटले.

गेल्या दोन दिवसांपासून सहा महिन्यांच्या कालावधीनंतर पुन्हा एकदा पीडियाट्रिक कोविडची प्रकरणे येऊ लागली आहेत. यामध्ये ताप, सर्दी आणि खोकला आणि डोळ्यांना संसर्ग यांसारखी लक्षणे असतात. मात्र, प्रतिक्रिया घेण्यासाठी डॉ.वशिष्ठ यांच्याशी संपर्क होऊ शकला नाही.

मॅक्स सुपर स्पेशालिटी हॉस्पिटल, शालिमार बाग, बालरोग विभागाचे संचालक डॉ. पी.एस. नारंग यांनी दिलेल्या माहितीनुसार, बहुधा, एक वर्षापेक्षा कमी वयाच्या लहान मुलांना कधीकधी संसर्ग झाल्यास रुग्णालयात दाखल करावे लागते, परंतु या वयोगटातील लोकांना सौम्य वेदना आणि ताप येतो आणि नंतर एक किंवा दोन दिवसात बरे होतात,

ते पुढे म्हणाले की, व्हायरल इन्फेक्शनने डोळे लाल होण्याची काही प्रकरणे आहेत. हे एडेनो व्हायरसमध्ये खूप सामान्य आहेत, परंतु ते कोविड देखील असू शकतात. नारंग म्हणाले की कोविड, फ्लू, राइनो व्हायरस आणि एडेनो व्हायरस रोगांवर जवळजवळ समान उपचार केले जातात. एका हिंदी वेबसाईटने याबाबतचे वृत्त दिले आहे.