Corona Virus : भय इथले संपत नाही! महिलांपेक्षा पुरुषांसाठी कोरोना जास्त धोकादायक; रिसर्चमध्ये मोठा खुलासा

By ऑनलाइन लोकमत | Published: October 7, 2023 05:34 PM2023-10-07T17:34:46+5:302023-10-07T17:52:22+5:30

Corona Virus : कोरोना व्हायरस महिलांपेक्षा पुरुषांसाठी जास्त धोकादायक आहे. याचे कारण ACE-2 प्रोटीन आहे. रिसर्चमध्ये ही बाब समोर आली आहे.

वेगाने पसरणाऱ्या कोरोनामुळे लोकांमध्ये भीतीचे वातावरण निर्माण झाले आहे. याच दरम्यान कोरोनाबाबत नवनवीन माहिती समोर येत आहे. कोरोना व्हायरस महिलांपेक्षा पुरुषांसाठी जास्त धोकादायक आहे. याचे कारण ACE-2 प्रोटीन आहे. रिसर्चमध्ये ही बाब समोर आली आहे.

आयसायन्स मेडिकल जर्नलमध्ये प्रकाशित झालेल्या अभ्यासात संशोधकांनी याबाबत उंदरांवर प्री-क्लिनिकल संशोधन केलं आहे. या अभ्यासातून असं समोर आलं आहे की, कोरोना दरम्यान पुरुषांमध्ये ACE-2 प्रोटीनची कमतरता कोरोनाच्या गंभीर स्थितीसाठी जबाबदार आहे.

अभ्यासातून समोर आले आहे की, कोरोनाची लागण झाल्यानंतर, कोरोना व्हायरस रुग्णाच्या प्रोटीन पेशींपर्यंत पोहोचतो आणि ACE-2 वर परिणाम करतो. ACE-2 सेलच्या बाह्य पृष्ठभागावर स्थित आहे. ब्लड प्रेशर आणि सूज नियंत्रित ठेवण्यासोबतच अवयवांमध्ये जास्त सूज आल्याने होणारे नुकसानही टाळते.

रिसर्चमध्ये असेही समोर आले आहे की, कोरोनाची तीव्रता आणि कोरोनामुळे होणाऱ्या मृत्यूच्या बाबतीत पुरुषांची संख्या महिलांपेक्षा जास्त आहे. मात्र, याचे नेमके कारण अद्याप स्पष्ट झालेलं नाही.

कॅनडातील टोरंटो विद्यापीठाचे प्राध्यापक. हाइबो झांग म्हणतात की ACE-2 प्रोटीन एन्कोड करणारे जीन X गुणसूत्रावर स्थित आहे. याचा अर्थ असा की महिलांमध्ये जीनच्या दोन प्रती असतात, तर पुरुषांकडे फक्त एक असतो.

रिसर्चमध्ये असे दिसून आले की निरोगी पुरुष आणि महिलांमध्ये ACE-2 प्रोटीनची पातळी समान होती, तर कोरोनाची लागण झाल्यानंतर पुरुषांमध्ये ACE-2 प्रोटीनची कमतरता दिसून आली. मात्र बाधित महिलांमध्ये कोणताही बदल झालेला नाही.

अशा परिस्थितीत, संशोधकांचा असा विश्वास आहे की पुरुषांमध्ये कोरोनाच्या अधिक गंभीर प्रकरणांचे कारण ACE-2 ची कमतरता असू शकते. यानंतर, संशोधकांनी प्रयोगशाळेत तयार केलेले ACE-2 प्रोटीन थेट पुरुषांच्या फुफ्फुसात इनहेलरद्वारे पोहोचवले.

यानंतर, असे आढळून आले की कोरोना बाधित पुरुषांना दररोज ACE-2 श्वास घेतल्याने त्यांच्या फुफ्फुसात व्हायरसचे प्रमाण कमी होते. अनेक देशात आता पुन्हा कोरोनाचा कहर पाहायला मिळत आहे. एका हिंदी वेबसाईटने याबाबतचे वृत्त दिले आहे.