CoronaVirus : चीनचा पलटवार; "नुकसान भरपाई मागणारे स्वप्न पाहतायत, आम्ही झुकणार नाही"

कोरोना व्हायरसच्या मुद्यावरून संपूर्ण जग चीनवर टीका करत आहे. चीनवर अनेक प्रकारचे आरोपही केले जात आहेत. एवढेच नाही, तर कोरोना महामारीसाठी चीनला जबाबदार धरत, झालेल्या नुकसानाची भरपाईदेखील मागितली जात आहे. मात्र याला चीनने स्पष्ट शब्दात नकार दिला आहे.

यासंदर्भात चीनचे परराष्ट्रमंत्री वॉन्ग यी रविवारी म्हणाले, चीनकडे नुकसान भरपाई मागणारे लोक स्वप्न पाहत आहेत. यापूर्वी वॉन्ग म्हणाले होते, की कोरोना व्हायरससंदर्भातील आंतरराष्ट्रीय तपासासाठी चीन तयार आहे. मात्र, हा तपास राजकीय हस्तक्षेपापासून मुक्त असायला हवा.

वॉन्ग म्हणाले, 'इतर देशांप्रमाणेच चीनलाही कोरोनाचा फटका बसला आहे आणि जेव्हा गरज पडली, तेव्हा इतर गरजू सरकारांचीही चीनने मदत केली आहे.

ते म्हणाले, "अम्हाला वाईट वाटते की, कोरोना शिवाय, अमेरिकेत, एक राजकीय व्हायरसदेखील पसरला आहे. जो चीनवर हल्ला करण्याची आणि चीनला बदनाम करण्याची एकही संधी सोडत नाही."

वांग म्हणाले, तथ्य माहित नसलेल्या काही अमेरिकन नेत्यांनी खोटी माहिती पसरवली आहे आणि अनेक कटही रचले आहेत. अशा प्रकाचे खटले आंतरराष्ट्रीय कायद्याच्या कसोटीवर सिद्ध होणार नाहीत. हे विवेकाला धरून नसेल. हे खोटारडे, न्यायसंगत नसलेले आणि बेकायदेशीर आहेत.

अप्रत्यक्षपणे अमेरिकेला सावध करताना वांग म्हणाले, चीन विरोधात अशाप्रकारचे वाद जे लोक आणतील, ते दिवसा स्वप्त पाहत आहेत आणि स्वतःलाच अपमानित करतील.'

जगातील अनेक देश, या महामारीसाठी चीनला जबाबदार धरत आहेत. अमेरिका, ऑस्ट्रेलिया आणि जपान उघड पणे चीनवर हल्ला करत आहेत. एवढेच नाही, तर चीन आणि वुहान लॅबची चौकशी व्हावी यासाठी अमेरिका आग्रही आहे.

कोरोनासंदर्भात अमेरिकेने चीनवर आरोप केल्यानंतर जर्मनी आणि फ्रान्स सारख्या देशांनीही चीनलाच आरोपीच्या पिंजऱ्यात उभे केले होते.

अमेरिकेचे परराष्ट्रमंत्री माइक पॉम्पियो यांनी गेल्या महिन्यात म्हटले होते, की चीनने कोरोना संदर्भात माहिती लपवून जागतीक अर्थव्यवस्थेचे नुकसान केले आहे.