CoronaVirus News : कोरोनाच्या लढ्यात आशेचा किरण! देशात 'या' 9 औषधांची केली जातेय चाचणी

CoronaVirus Marathi News and Live Updates: भारतात कोरोनाविरूद्ध 9 औषधांची चाचणी सुरू आहे. नीति आयोग (आरोग्य) सदस्य व्ही के पॉल यांनी याबाबत माहिती दिली.

जगभरात कोरोनामुळे मृत्युमुखी पडलेल्यांचा आकडा तीन लाखांच्या वर पोहोचला आहे. कोरोना व्हायरसमुळे इटली, स्पेन, अमेरिका आणि युरोपमध्ये गंभीर परिस्थिती ओढवली आहे.

तब्बल 57 लाखांहून अधिक लोकांना कोरोनाचा संसर्ग झाल्याची माहिती मिळत आहे. कोरोनामुळे मृत्युमुखी पडलेल्यांमध्ये सर्वाधिक संख्या ही इटली, स्पेन आणि अमेरिकेतील रुग्णांची आहे.

भारतातही कोरोनाबाधितांचा आकडा दीड लाखांच्या वर पोहोचला आहे. तर 4000 हून अधिक जणांना आपला जीव गमवावा लागला आहे. कोरोनाचा संसर्ग रोखण्यासाठी सर्व खबरदारीचे उपाय केले जात आहेत.

कोरोना व्हायरसवर अद्याप कोणतंही औषध उपलब्ध झालेलं नाही. कोरोना महामारीचा सामना करण्यासाठी हायड्रोक्सीक्लोरोक्वीन (एचसीक्यू) या गोळ्या अत्यंत महत्त्वाच्या मानल्या जातात.

कोरोनाला रोखण्यासाठी पंतप्रधान नरेंद्र मोदी यांनी देशात लॉकडाऊनची घोषणा केली आहे. यामुळे कोरोनावर बऱ्यापैकी नियंत्रण मिळवण्यात इतर देशांच्या तुलनेत भारत यशस्वी झाला आहे.

भारतात कोरोनाविरूद्ध 9 औषधांची चाचणी सुरू आहे. नीति आयोग (आरोग्य) सदस्य व्ही के पॉल यांनी याबाबत माहिती दिली.

देशातील सुमारे 20 नवीन कंपन्या कोविड 19 साठी चाचणी किट बनवित आहेत. जुलैपर्यंत देशात दररोज 5 लाख देशी किट तयार होतील. कोरोनाच्या विरूद्ध भारत अनेक लस चाचण्या घेत असल्याची माहिती पॉल यांनी दिली.

1. फेवीपेरावीर (favipiravir)

फेवीपेरावीर हे अँटी व्हायरल औषध आहे. हे औषध तोंडातून घेतले जाते. याची चाचणी केली जात आहे.

2. एसीक्यूएच

फायटो फार्मास्युटिकल हे एका झाडाशीसंबंधित एक भारतीय प्रोडक्ट आहे. एसीक्यूएच असं त्याचं नाव आहे. त्याची चाचणी सीएसआयआरच्या प्रयोगशाळेत केली जात आहे.

3. इटोलीजुमॅब (itolizumab)

इटोलीजुमॅब हे एक औषध आहे. हे संधिवातात दिले जाते.

4. बीसीजी लस

व्ही के पॉल यांनी दिलेल्या माहितीनुसार, लहान असताना ही लस घेतली आहे. जर ही लस पुन्हा घेतली तर त्या व्यक्तीची रोगप्रतिकार शक्ती वाढते.

5. मायक्रोबॅक्टेरियम डब्ल्यू

मायक्रोबॅक्टेरियम डब्ल्यू हे औषध रोग प्रतिकारशक्ती वाढवते.

6. आर्बिडॉल (arbidol)

आर्बिडॉल या औषधाचीही चाचणी सुरू आहे.

7. रेमडिसिविर

कोरोनाच्या लढ्यात रेमडिसिविर हे औषध महत्त्वाचं मानलं जात आहे.

8. कॉन्व्हेसलेंट प्लाझ्मा

कॉन्व्हेसलेंट प्लाझ्मा ट्रायल आयसीएमआरच्या देखरेखीखाली सुरू आहे.

9. हायड्रोक्सीक्लोरोक्वीन

हायड्रोक्सीक्लोरोक्वीन औषध हे मलेरिया विरोधी औषध आहे. दीर्घ काळापासून भारतात मलेरियाविरूद्ध वापरले जात आहे.

कोविड 19 विरुद्धची अंतिम लढाई केवळ लसीद्वारेच जिंकली जाईल. आपल्या देशात त्यासाठी प्रयत्न सुरू आहे अशी माहिती व्ही के पॉल यांनी दिली आहे. एका हिंदी वेबसाईटने याबाबतचे वृत्त दिले आहे.