२०२४ निवडणुकीसाठी नरेंद्र मोदींचे NDA खासदारांना ५ कानमंत्र; काय आहे अर्थ? वाचा

पंतप्रधान नरेंद्र मोदींनी सोमवारी वेगवेगळ्या बैठकांमध्ये एनडीएच्या ८३ खासदारांची भेट घेतली. त्यावेळी मोदींनी खासदारांना कानमंत्र दिला. ज्यामुळे खासदारांना केवळ त्यांच्या मतदारसंघात वर्चस्व निर्माण करता येणार नाही तर NDA तील घटक पक्षातील जवळीक वाढेल. आणि आघाडी आणखी मजबूत होईल.

पंतप्रधान मोदींनी खासदारांना जास्तीत जास्त वेळ मतदारसंघात घालवण्याचा सल्ला दिला. याचसोबत नीतीश कुमार आणि पंजाबमध्ये अकाली दल यांचा उल्लेख करत भाजपाने सहकारी पक्षांचे महत्त्वही खासदारांना सांगितले. पीएम मोदींनी खासदारांना स्थानिक समस्यांकडे अधिक लक्ष देण्याचा आणि विरोधी गटावर हल्ला चढवण्याचा सल्ला दिला.आगामी लोकसभा निवडणुकीत अधिक जागा जिंकण्यासाठी मोदींनी खासदारांना या पाच सूचना दिल्या आहेत. या सुचना सविस्तरपणे समजून घेऊ आणि त्याचा अर्थ जाणून घेऊया.

मतदारसंघात जा आणि लोकांमध्ये राहा

पंतप्रधान मोदींनी एनडीएच्या सर्व खासदारांना पहिला सल्ला दिला होता की, त्यांनी जास्तीत जास्त वेळ त्यांच्या मतदारसंघात राहावे. लग्नसराईचा हंगाम जवळ आला आहे, अशा परिस्थितीत त्यांनी आपल्या भागातील लोकांमध्ये अधिकाधिक वेळ घालवावा आणि अधिकाधिक लोकांना भेटावे असे त्यांनी सांगितले. यावेळी त्यांनी लोकांच्या समस्या, सूचना, समस्या समजून घेऊन त्या सोडवण्याचा प्रयत्न करावा.

पंतप्रधान मोदींनी खासदारांना राष्ट्रीय-आंतरराष्ट्रीय मुद्द्यांवर चर्चा करण्याऐवजी स्थानिक मुद्द्यांवर अधिक लक्ष केंद्रित करण्यास सांगितले. त्यामुळे खासदारांचा आपल्या भागातील जनतेशी संपर्क वाढेल आणि त्याचा फायदा त्यांना निवडणुकीत मिळू शकेल. कर्नाटक निवडणुकीतून भाजपने घेतलेला धडा या सूचनेतून दिसून येतो. कर्नाटक निवडणुकीदरम्यान विरोधकांनी स्थानिक मुद्द्यांवर जोर दिला आणि भाजपा प्रादेशिक मुद्द्यांपासून दूर जात राहिला. त्यामुळे भाजपला निवडणुकीत पराभवाला सामोरे जावे लागले. अशा परिस्थितीत आता पीएम मोदींनी खासदारांना प्रादेशिक मुद्दे आणि लोकांमध्ये जाण्याचा आणि राष्ट्रीय-आंतरराष्ट्रीय मुद्द्यांपासून दूर राहण्याचा सल्ला दिला आहे.

केंद्राची धोरणे जनतेला सांगा

पीएम मोदींनी खासदारांना सांगितले की, केंद्र सरकारच्या योजनांच्या लाभामुळे लोकांचे जीवन बदलले आहे. या योजना अद्यापही अनेक लोकांपर्यंत पोहोचल्या नाहीत कारण त्यांना त्यांची माहिती नाही. अशा परिस्थितीत त्यांना या योजनांबद्दल सांगा आणि समजावून सांगा. उज्ज्वला योजना, आयुष्मान भारत आणि प्रधानमंत्री आवास यासह अनेक योजना आहेत, ज्याचा लोकांना थेट लाभ मिळाला आहे आणि त्याचे लाभार्थी भाजपचा नवीन मतदार गट म्हणून उदयास आले आहेत. अशा परिस्थितीत पंतप्रधानांच्या या सल्ल्याने एकीकडे खासदारांना या योजनांचा लाभ त्यांच्या भागातील जनतेपर्यंत पोहोचवता येईल, तसेच त्यांचा पाठिंबाही मिळेल.

'वर्ड ऑफ माऊथ' हे मार्केटिंगमधील जाहिरातीचेही एक साधन आहे, म्हणजेच मार्केटिंगच्या भाषेत, जर एखाद्या ग्राहकाला एखाद्या उत्पादनातून किंवा कंपनीचा काही फायदा झाला आणि त्याने हा फायदा त्याच्या आजूबाजूच्या लोकांना सांगितला, तर कंपनीची प्रसिद्धी मोफत केले जाते. तुमच्या ओळखीच्या व्यक्तीकडून उत्पादनाबद्दल ऐकून, लोकांमध्ये या प्रकारच्या जाहिरातीचा प्रभावही खूप जास्त असतो. म्हणजेच पंतप्रधान मोदींचा हा सल्ला खासदारांनी पाळला तर त्यांना असे प्रचारक लाभार्थी म्हणून मिळतील, ज्यांच्याकडे केंद्राच्या विकास योजनांचा प्रत्यक्ष पुरावाही असेल. या प्रसिद्धीमुळे खासदारांना चांगला फायदा होऊ शकतो.

नितीशकुमार आणि बिहारचा उल्लेख

पंतप्रधान मोदींनी खासदारांसोबतच्या बैठकीत एनडीएच्या स्थापनेदरम्यानच्या मूळ भावनेचाही उल्लेख केला. एनडीए ही स्वार्थाची नसून त्यागाची युती असल्याचे त्यांनी सांगितले. या वक्तव्यासोबत पंतप्रधान मोदींनी बिहारचे मुख्यमंत्री नितीशकुमार यांचा उल्लेख केला. एनडीए स्वार्थी होत नाही, म्हणूनच बिहारमध्ये आमदारांची संख्या कमी असतानाही एनडीएने नितीश यांना मुख्यमंत्री केले, असे पंतप्रधान मोदी म्हणाले. पंजाबच्या अकाली दलाबाबतही पंतप्रधान मोदींनी असेच म्हटले आहे.

पंतप्रधानांच्या या विधानाचा अर्थ काढला, तर भाजपच्या दृष्टीने एनडीएमध्ये सहभागी असलेल्या पक्षांचे महत्त्व अधिक आहे, हे यातून ते खासदारांना सांगण्याचा प्रयत्न करत असल्याचे समजते. पक्ष छोटा असो वा मोठा याने फरक पडत नाही. म्हणजे स्वार्थाऐवजी एनडीएच्या त्यागाच्या भावनेवर भाजप काम करेल. हे आश्वासन लहान पक्षांसाठी पुरेसे मोठे आहे. एनडीए ही ३८ पक्षांची संघटना आहे, ज्यामध्ये बहुतेक पक्ष छोटे आणि प्रादेशिक आहेत.

यूपीएवर हल्ला, नाव बदलून चालणार नाही

केंद्राच्या योजना सांगण्यासोबत पंतप्रधान मोदींनी खासदारांना विरोधकांच्या भ्रष्टाचाराच्या यादी आठवण करून देण्याचा सल्लाही दिला. पीएम मोदी म्हणाले की, विरोधी पक्षांनी यूपीएचे नाव बदलून इंडिया केले आहे. यामुळे त्यांच्या जुन्या कार्यकाळातील पापे लपून राहणार नाहीत. नाव बदलून पाप कमी होत नाही, हा संदेश आपापल्या भागातील लोकांना द्या, असे पंतप्रधान मोदी म्हणाले. या मंत्राद्वारे पंतप्रधानांना विरोधकांच्या डावपेचांना तोंड द्यायचे आहे, जे त्यांनी इंडियाच्या नावाने चालवले आहेत.

सोशल मीडियावर सक्रिय व्हा

भारतीय जनता पक्ष आणि पंतप्रधान नरेंद्र मोदी यांना सध्याच्या काळात सोशल मीडियाचे महत्त्व चांगलेच समजले आहे. अशा परिस्थितीत पंतप्रधान मोदींनी खासदारांना सोशल मीडियावर सक्रिय राहून केंद्र सरकारची धोरणे शेअर करत राहण्याचा सल्ला दिला. पंतप्रधान मोदी म्हणाले की, सोशल मीडियाच्या माध्यमातून छोट्या-छोट्या घटनांमुळे मोठा फरक पडू शकतो आणि वातावरण बदलू शकते. उत्तराखंड विधानसभा निवडणुकीदरम्यान एका वृद्ध महिलेचा व्हिडिओ व्हायरल झाला होता, ज्याने राज्यात गेम चेंजरची भूमिका बजावली होती असं उदाहरण त्यांनी दिले. पंतप्रधानांनी सांगितले की, त्या व्हिडिओमध्ये एका वृद्ध महिलेने म्हटले होते की, माझी मुले माझी काळजी घेत नाहीत, पण माझा एक मुलगा दिल्लीत बसला आहे जो माझी काळजी घेतो. त्या महिलेचा संकेत पंतप्रधान मोदींकडे होता.

मोदी एनडीएच्या ४३० खासदारांना भेटणार

या मंत्रांच्या माध्यमातून खासदारांचा जनतेशी संबंध दृढ करणे हा पंतप्रधान मोदींचा उद्देश आहे. जेणेकरून आगामी लोकसभा निवडणुकीत भाजपला जास्त जागा जिंकता येतील. पीएम मोदी ११ बैठकांद्वारे NDA च्या ४३० खासदारांना भेटणार आहेत. पहिली आणि दुसरी बैठक सोमवारी झाली, ज्यामध्ये उत्तर प्रदेश पश्चिम, ब्रिज, कानपूर आणि बुंदेलखंड याशिवाय झारखंड, पश्चिम बंगाल आणि ओडिशा या राज्यांतील खासदारांनी हजेरी लावली.