हलव्याचे नाजूक दागिने एक से एक सुंदर, पाहा पर्याय! यादगार करा पहिली संक्रांत

सौंदर्य खुलवणारे हलव्याचे दागिने पहिल्या संक्रांतीला तरी हवेतच...

महाराष्ट्रातच नाही तर भारतात अनेक राज्यांत वेगवेगळ्या नावांनी मकर संक्रांत साजरी केली जाते.

संक्रांत म्हणजे तीळगूळ आणि हलवा याचेच महत्त्व जास्त. यातही लग्नानंतरची पहिली संक्रांत म्हणजे घरात आलेल्या सुनेचे कौतुकच कौतुक.

एरवी सोन्याच्या दागिन्यांना असलेले मोल संक्रांतीच्या दिवशी हलव्याच्या दागिन्यांना येते. बाजारात मिळणाऱ्या या दागिन्यांची व्हरायटी पाहून आपल्यालाही खूप छान वाटते.

बाजारात सध्या हलव्याच्या दागिन्यांच्या एकाहून एक व्हरायटी पाहायला मिळत असून यामध्ये पारंपरिक दागिन्यांबरोबरच काही ट्रेंडी दागिनेही पाहायला मिळतात.

गळ्यातला हार, मंगळसूत्र, बांगड्या, कानातले, बिंदी, कंबरपट्टा, मुकूट, वाकी, नथ असे एकाहून एक दागिने सध्या बाजारात उपलब्ध असतात. पुरुषांसाठीही मोठा हार, मुकूट, हातातले, फुलांचा गुच्छ असे दागिने मिळतात.

काळ्या साडीवर उठून दिसणारा हा पांढरा हलवा या दिवसाची रंगत वाढवतो आणि आपल्या सौंदर्यात भरच पाडतो.

मोठमोठ्या दागिन्यांबरोबरच बाजारात आता तरुणींना पसंत पडतील असे अगदी नाजून आणि मोजके दागिन्यांचे सेटही उपलब्ध असतात. अगदी खऱ्या दागिन्यांप्रमाणे दिसणारे हे दागिने लक्ष वेधून घेणारे ठरतात.

यामध्ये कागदी किंवा खऱ्या फुलांसोबत केलेली डिझाइन, सोनेरी बेस असलेली डिझाइन, खोट्या फुलांचा वापर करुन केलेले कॉम्बिनेशन असे एकाहून एक प्रकार पाहायला मिळतात.

संक्रांतीच्या हळदीकुंकवाच्या दिवशी नटून थटून एकमेकींना हळदीकुंकवाला बोलावले जाते. तर तीळगूळ देऊन सौभाग्याचे वाण देण्याचीही पद्धत आहे.