ताणतणाव कमी करण्यासाठी ५ पदार्थ खा, तज्ज्ञ सांगतात स्ट्रेस, टेन्शन कमी होऊन व्हाल रिलॅक्स..

आजकालच्या जगात ताणतणाव, टेन्शन सगळ्यांनाच आहे. अगदी शाळकरी विद्यार्थीही याला अपवाद नाहीत. अभ्यास, शिक्षण, करिअर, नोकरी, नातेसंबंध अशा वेगवेगळ्या पातळ्यांवर प्रत्येकालाच काही ना काही टेन्शन आहेच. कशाचा तरी स्ट्रेस असतोच.

एखाद्या गोष्टीचा खूप ताण घेऊन काही होत नाही, हे आपल्याला माहिती आहे. पण तरी टेन्शन घेण्याची, स्वत:ला त्रास करून घेण्याची सवय काही जात नाही. कधीकधी स्ट्रेस खूपच त्रासदायक होऊ लागतो. अशावेळी इतर सगळा विचार सोडा आणि या ५ पैकी एखादा पदार्थ तरी अवश्य खा.

झीन्यूज यांनी दिलेल्या वृत्तानुसार एनसीबीआयमध्ये प्रकाशित करण्यात आलेल्या माहितीनुसार काही पदार्थांमध्ये असे काही घटक असतात जे ताणतणाव कमी करण्यासाठी मदत करतात.

यापैकी पहिला पदार्थ आहे दही. दह्यामध्ये असणारे प्रोबायोटिक आणि कॅल्शियम हे घटक ताण कमी करण्यासाठी मदत करतात.

स्ट्रेस वाढल्यावर डार्क चॉकलेट खाऊन पाहा. त्यामध्ये असणारं कोको एंडोर्फिन हे केमिकल स्त्रवण्यास मदत करतं. त्यामुळे मग मूड आनंदी होण्यास आणि ताण कमी होण्यास मदत होते.

बदाम, अक्रोड, काजू, सुर्यफुलाच्या बिया हे देखील ताण कमी करण्यासाठी मदत करतात. त्यांच्यामध्ये असणाऱ्या व्हिटॅमिन ई, मॅग्नेशियम, ओमेगा ३ फॅटी ॲसिड यामुळे ताण कमी होतो.

चौथा पदार्थ आहे केळी. केळीमध्ये पोटॅशियम उत्तम प्रमाणात असतं. त्यामुळे रक्तदाब नियंत्रित राहण्यास मदत होते. त्यामुळे तणाव कमी होतो. तसेच त्यामध्ये असणारे व्हिटॅमिन बी ६ देखील स्ट्रेस कमी करण्यासाठी मदत करतात.

बेरी प्रकारच्या फळांमध्ये ॲण्टीऑक्सिडंट्स असतात. ते स्ट्रेस कमी करण्यासाठी मदत करतात. टेन्शनमध्ये असल्यास १० ते १२ बेरी खा. यामुळे ताण कमी होऊन मूड सुधारण्यास मदत होईल.