पिंपरी : गहुंजे स्टेडियमवर आयपीएलच्या क्रिकेट सामन्या दरम्यान थेट मैदानात उतरून एका चाहत्याने विराट कोहलीला हस्तांदोलन केले आणि राेहित शर्माला भेटण्यासाठी धावत गेला. पोलिसांनी ताब्यात घेतले असता चाहता पोलिसांच्या अंगावर धावून आला. सरकारी कामात अडथळा निर्माण केल्याप्रकरणी त्याच्या विरोधात पोलिसांनी गुन्हा दाखल केला. गहुंजे स्टेडियमवर रॉयल चॅलेंजर्स बंगलोर आणि मुंबई इंडियन्स या संघांतील सामन्याच्या वेळी शनिवारी (दि. ९) रात्री साडेदहा ते पावणे अकरा या वेळेत हा प्रकार घडला. दशरथ राजेंद्र जाधव (वय २६, केसुर्डी, खंडाळा, सातारा) असे अटक केलेल्या चाहत्याचे नाव आहे.
पोलिसांनी दिलेल्या माहितीनुसार, गहुंजे स्टेडियमवर शनिवारी आयपीएल साखळी सामन्यातील रॉयल चॅलेंजर्स बंगलोर आणि मुंबई इंडियन्स संघातील सामना होता. या सामन्यावेळी दशरथ हा सुरक्षा तारा ओलांडून मैदानावर असलेल्या विराट कोहली व रोहीत शर्माला भेटण्यासाठी धावत गेला. कोहलीला हस्तांदोलन करून तो रोहित शर्माकडे जात असताना त्याला पोलिसांनी ताब्यात घेतले. त्यावेळी तो पोलिसांच्या अंगावर धावून येत होता. तसेच फिर्यादी करीत असलेल्या शासकीय कामात अडथळा निर्माण केला, असे फिर्यादीत नमूद आहे.