"तो इतका मोठा नाही"; ‘बारामती ॲग्रो’वर ‘ईडी’च्या धाडसत्रानंतर काका-पुतण्यात जुंपली

‘बारामती ॲग्रो’ या कंपनीवर शुक्रवारी ‘ईडी’चे छापे पडले

लोकमत न्यूज नेटवर्क, पिंपरी: स्वायत्त संस्था स्वतंत्रपणे काम करीत असतात. माझ्यावर अनेकवेळा कारवाई झाली; मात्र त्यातून समोर काहीच आले नाही. रोहितवर कारवाई झाली. त्यानंतर रोहित काय प्रश्न करतोय? त्याच्या प्रश्नावर उत्तर द्यायला तो इतका मोठा नाही, अशी टीका उपमुख्यमंत्री अजित पवार यांनी शनिवारी केली.

आमदार रोहित पवार यांच्या ‘बारामती ॲग्रो’ या कंपनीवर शुक्रवारी ‘ईडी’चे छापे पडले. त्यानंतर रोहित पवार यांनी आठ दिवसांपूर्वी दिल्लीला कोण गेले होते? हे तपासा, असा प्रश्न उपस्थित केला. याबाबत पवार म्हणाले, कोण कधी आणि कुठे गेला होता? याचा तपास करा. त्याच्या प्रश्नाला माझ्या पक्षाचे प्रवक्ते व कार्यकर्ते उत्तर देतील. 

‘बच्चे मन के सच्चे’: रोहित पवार

काका अजित पवार यांच्या या प्रतिक्रियेनंतर रोहित पवार यांनी समाजमाध्यमावर प्रतिक्रिया देताना लहान मुलीचा ‘बच्चे मन के सच्चे’ म्हणतानाचा व्हिडीओ शेअर केला आहे. सोबत ‘बच्चे मन के सच्चे, दिल हे साफ नफरत से है दूर’ असे लिहिले.