पिंपरी : तरुणाने दुचाकीस्वाराला अडविले. मला लग्न करायचे असलेल्या तरुणीसोबत तू लग्न करून नकोस, असे सांगूनही तू तिच्यासोबत लग्न केले, असे म्हणून तरुणाने व इतर तीन जणांनी दुचाकीस्वाराला कोयत्याने व सत्तूरने वार करून गंभीर जखमी केले. खुनी हल्ल्याप्रकरणी चौघांच्या विरोधात पोलिसांनी गुन्हा दाखल केला. विद्यानगर, चिंचवड येथे सोमवारी (दि. ११) सकाळी दहाच्या सुमारास ही घटना घडली.
संतोष कळसकर (वय २५), आदित्य दीपक तेली (वय २४), रणजित प्रल्हाद शेडगे (वय २२, तिघेही रा. विद्यानगर, चिंचवड) तसेच एक अनोळखी इसम यांच्या विरोधात पोलिसांनी गुन्हा दाखल केला. याप्रकरणी गंभीर जखमी झालेल्या २५ वर्षीय दुचाकीस्वार तरुणाने पिंपरी पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी तरुण आणि त्याची पत्नी हे दोघेही वेगवेगळ्या दुचाकीवरून जात होते. फिर्यादी त्याच्या पत्नीला मोरवाडी, पिंपरी येथे कामावर सोडायला जात होता. त्यावेळी विद्यानगर येथील पदमसी बाबर चौकाजवळ आरोपी संतोष कळसकर याने फिर्यादी तरुणाला थांबविले. मला तुझ्या बरोबर बोलायचे आहे, असे सांगून आरोपी संतोष कळसकर याने फिर्यादी तरुणाला वाॅशिंग सेटरच्या पाठीमागील बाजूस नेले. मी तुला त्या तरुणीसोबत लग्न करू नको, मला तिच्याबरोबर लग्न करायचे होते, हे तुला सांगूनही तू माझे ऐकले नाही. तू तिच्यावर चिडचिड का करतो, असे आराेपी कळसकर हा फिर्यादीला म्हणाला. त्यानंतर फिर्यादीला शिवीगाळ करून हाताने मारहाण करून कोयत्याने वार केले.
तेव्हा फिर्यादी त्याच्या तावडीतून निसटून परशुराम चौकाकडे जाणाऱ्या रस्त्याने पळू लागला. त्यावेळी आरोपींनी फिर्यादीला जिवे ठार मारण्याच्या उद्देशाने फिर्यादीच्या डोक्यावर दोन्ही हातावर, पाठीवर, छातीवर कोयत्याने व लोखंडी सत्तूरने वार करून गंभीर जखमी केले, असे फिर्यादीत नमूद आहे. सहायक पोलीस निरीक्षक गणेश लोंढे तपास करीत आहेत.