धायरी : उधारीवर दारु देण्यास नकार दिल्याने गुंडांच्या टोळक्याने बार मालकाच्या डोक्यात कोयत्याने वार करुन जीवे मारण्याचा प्रयत्न केल्याचा धक्कादायक प्रकार समोर आला आहे. याप्रकरणी गुरण्णा शिवण्णा तावरखेड (वय ४०, रा. मुक्तांगण हाईट, नर्‍हे) यांनी सिंहगड रस्ता पोलीस ठाण्यात तक्रार दिली आहे. त्यावरुन पोलिसांनी सराईत गुंड श्रीकांत थोपटे (वय: ३५) व इतर ५ ते ६ गुंडावर खूनाचा प्रयत्न केल्याचा गुन्हा दाखल केला आहे. हा प्रकार सिंहगड रस्ता परिसरातील नर्‍हे येथील लक्ष्मी बार अँड रेस्टॉरंटमध्ये शुक्रवारी रात्री साडेसहा वाजता घडला.
याबाबत पोलिसांनी दिलेल्या माहितीनुसार, तावरखेड यांच्या मालकीचे लक्ष्मी बार अँड रेस्टॉरंट आहे. गुरुवारी रात्री श्रीकांत थोपटे व त्यांच्या साथीदारांनी उधारीवर दारु मागितली होती. त्याला बार मालकाने नकार दिला होता. हा राग मनात ठेवून थोपटे व त्याचे साथीदार शुक्रवारी रात्री कारमधून आले. त्यांनी बार मालकाच्या डोक्यावर, हातावर व पोटावर कोयत्याने वार करुन गंभीर जखमी केले. रेस्टॉरंटमध्ये बसलेल्या ग्राहकांना शिवीगाळ करुन कोयते हवेत फिरवून आरडा ओरडा केला. त्यानंतर रस्त्यावर येऊन आजू बाजूच्या दुकानदारांना श्रीकांतभाई आला आहे, बघताय काय पळा दुकाने बंद करा नाही तर एक एकाला आज जीवंत सोडणार नाही, अशी धमकी देऊन दहशत पसरविली. पुढील तपास सिंहगड रस्ता पोलीस ठाण्याचे सहायक पोलीस निरीक्षक राहुल यादव तपास करीत आहेत.