भाजपाने पाठीत खंजीर खुपसला - संजय राऊत  

ज्या भाजपाला आयुष्यभर साथ दिली त्या पक्षाने शिवसेनेच्या पाठीत खंजीर खुपसला असल्याचा आरोप खासदार संजय राऊत यांनी केला.

केडगाव : ज्या भाजपाला आयुष्यभर साथ दिली त्या पक्षाने शिवसेनेच्या पाठीत खंजीर खुपसला असल्याचा आरोप खासदार संजय राऊत यांनी केला.केडगाव (ता. दौंड) येथील शिवसेना मेळाव्यात ते बोलत होते. राज्यमंत्री विजय शिवतरे, शिवसेना जिल्हाप्रमुख बाबा धुमाळ, सत्यवान उभे, महेश पासलकर, हेमलता परदेशी, लता जगताप, अनिल सोनवणे आदी मान्यवर उपस्थित होते.राऊत म्हणाले, की सध्या भाजपाची वागणूक गंभीर आहे. भाजपाचा सूड घेण्यासाठी प्रत्येक शिवसेना कार्यकर्त्यांनी मनामध्ये आग पेटवावी. आगामी काळात भाजपावाल्यांना भांडी घासायला लावणार असा पण करावा. भाजपाने दिलेली कर्जमाफी फसवी आहे. कर्जमाफी अगोदर वर्तमानपत्रामध्ये जाहिरातबाजी करण्यावर सरकारचा जोर आहे. भाजपा हा सुजलेला पक्ष असून प्रत्येक निवडणुकीत मुंबईचा पैसा वापरतात. शिवतरे म्हणाले, की प्रत्येकी निवडणुकीत कुरकुंभ मोरी या विषयावर दौंडचे राजकारण चालते. गेल्या वेळी जानकरांऐवजी मी लोकसभेला उमेदवार असतो तर काय झाले असते? तालुक्यामध्ये जो राष्ट्रवादीच्या चिन्हावर लढतो तो पडतो असा इतिहास आहे. त्यामुळे आगामी काळामध्ये दौंडमध्ये शिवसेना आमदार नक्की होईल, असे चित्र आजच्या गर्दीवरून दिसत आहे. नीलेश मेमाणे यांनी सूत्रसंचालन केले.