पंतप्रधान नरेंद्र मोदी, केंद्रीय मंत्री नितीन गडकरी यांचे पुण्यावर विशेष प्रेम- देवेंद्र फडणवीस

चांदणी चौकातील पुलाच्या लोकार्पण कार्यक्रमात बोलत होते...

पुणे : पुणे हे बुद्धीवंतांचे शहर असल्याने तिथले निर्णय घेताना दमछाक होते. पुण्यात कोंडीमुळे दिवसा चांदणं दिसतं त्यामुळे याला चांदणी चौक नाव पडले, असा माझा समज होता. पण आज अजित दादांमुळे चांदणी चौकाच्या नावाचा इतिहास समजला. अशी मिश्किल टिपण्णी उपमुख्यमंत्री देवेंद्र फडणवीस केली. गडकरींच्या आशीर्वादाने चांदणी चौकातील काम पूर्ण झाले. पुण्यातील वाहतूक कोंडी सोडण्यासाठी शहरात डबल टेकर फ्लायओव्हर उभारण्यात येणार, असंही फडणवीस म्हणाले. ते चांदणी चौकातील पुलाच्या लोकार्पण कार्यक्रमात बोलत होते. देशाचे वाहतूक मंत्री नितीन गडकरी यांच्या हस्ते हे लोकार्पण झाले.

यावेळी बोलताना फडणवीस म्हणाले, पुणे विमानतळाचे लवकर जमीन अधिग्रहण करण्यात येणार आहे. त्यामुळे पुण्याच्या विकासात वेगाने भर पडणार आहे. पुरंदरच्या विमानतळासाठी केंद्राच्या सर्व परवानग्या पूर्ण आहेत. त्यामुळे विमानतळाचे काम लवकर सुरू करण्यासाठी सरकार प्रयत्नशील आहे. वाहतूक कोंडी सोडवण्यासाठी पब्लिक ट्रान्सपोर्ट हा एकमेव पर्याय आहे. देशाचे पंतप्रधान नरेंद्र मोदी आणि केंद्रीय मंत्री नितीन गडकरी यांचे पुण्यावर विशेष प्रेम आहे.

हायड्रोजन भविष्य आहे-

यावेळी नितीन गडकरी म्हणाले, पुणे आता अधिक वाढवू नका. हे शहर आता प्रदूषित करु नका. मी लहान असताना माझ्या बहिणीकडे स्वारगेटला राहायला यायचो, तेव्हा पर्वतीवरुन गार हवा यायची. पण आता शहरातील प्रदुषणात वाढ झाली आहे.  मला भारतातून पेट्रोल आणि डिझेल हद्दपार करायचे आहे.  इथेनॉल, मिथेनॉल आणि हायड्रोजन याचा वापर वाढवा. हायड्रोजन हे भविष्य आहे. कचऱ्यापासून वीजनिर्मिती करु नका तर कचऱ्यापासून ग्रीन हायड्रोजन तयार करा. तेच भविष्य आहे, असंही गडकरी म्हणाले. पुण्याला पेट्रोल- डिझेलपासून मुक्त केले तर चाळीस टक्के प्रदुषण कमी होईल. पुण्यातील कचऱ्याचा उपयोग रिंग रोड तयार करण्यासाठी वापरला तर पुण्यात कचरा उरणार नाही.

केंद्रीय मंत्री नितीन गडकरी यांच्या हस्ते पुण्यातील बहुचर्चित चांदणी चौकातील रस्त्याचे लोकार्पण पार पडले. आज पुण्यातील ८६५ कोटी रुपये किंमतीच्या एनडीए चौक (चांदणी चौक) प्रकल्प व रस्त्याच्या कामाचे लोकार्पण झाले. यावेळी मुख्यमंत्री एकनाथ शिंदे (ऑनलाइन उपस्थिती), उपमुख्यमंत्री देवेंद्र फडणवीस, अजित पवार, पालकमंत्री चंद्रकांत पाटील, खासदार श्रीरंग बारणे, आमदार माधुरी मिसाळ, आमदार भीमराव तापकीर, माजी खासदार शिवाजीराव आढळराव पाटील, उपस्थित होते. यानंतर हा मार्ग वाहतुकीसाठी खुला करण्यात आला.