या बंडामागे शरद पवार असण्याची शंका, राज ठाकरेंनी सांगितलं राज'कारण'

पुण्यातील प्रभात रस्त्यावरील निवासस्थानी आले असताना राज यांनी पत्रकारांबरोबर बोलताना राज्यातील राजकीय घडामोडींवर भाष्य केलं

पुणे - राज्यात सध्या जे काही सुरू आहे ते किळसवाणे आहे. महाराष्ट्रातील कुठल्याही घरात जावा तुम्हाला शिव्या ऐकायला मिळतील, एवढी चीड जनतेला या राजकारणाची आली आहे, असे म्हणत महाराष्ट्र नवनिर्माण सेनेचे अध्यक्ष राज ठाकरेंनी राज्यातील बंडखोरीच्या राजकारणावर मत व्यक्त केलं. तसेच, घड्याळाने काटा काढला की काट्याने घड्याळ काढलं काहीच समजत नाही. मात्र, हे काही अचानक घडलेले नाही तर फार आधीपासून ठरत होतं, अशी टीकाही राज यांनी केली. तर, या बंडामागे शरद पवारांचाच हात आहे, असेही राज यांनी म्हटले. यावेळी, तीन वरिष्ठ नेत्यांची नावे त्यांनी घेतली.  

पुण्यातील प्रभात रस्त्यावरील निवासस्थानी आले असताना राज यांनी पत्रकारांबरोबर बोलताना राज्यातील राजकीय घडामोडींवर भाष्य केलं. या सर्व किळसवाण्या गोष्टी आहेत. अशा गोष्टी अचानक होत नाहीत. हे सगळे फार आधीपासून प्लॅन केलेले असणार. प्रफुल्ल पाटील, छगन भुजबळ आणि दिलीप वळसे हे अजित पवार यांच्याकडे जाणाऱ्यांतले नाहीत. हे तिघे अजित पवारांसोबत गेल्यामुळे शंका येते. शरद पवार यांच्याबरोबरची ही माणसे अचानक उठतील व अजित पवारांना साथ देतील असे होणार नाही. त्यामुळे या सर्व घडामोडींमध्ये शंकेला जागा आहेत. जे झाले त्यात शरद पवार यांचा हात असण्याची शक्यताही राज यांनी व्यक्त केली. उद्या खासदार सुप्रिया सुळे केंद्रीय मंत्री झाल्या तर आश्चर्य वाटणार नाही, या आपल्या वक्तव्याचा पुनरूच्चारही त्यांनी केला.

सध्या कोण कुठे आहे ते फक्त महाराष्ट्र नवनिर्माण सेनेच्या पदाधिकाऱ्यांबाबत सांगता येईल, बाबू वागसकर कुठे आहेत तर ते मनसेत आहेत असे सांगता येते, बाकी कोण कुठे, कोणाबरोबर आहे हे सांगणे अशक्य आहे. कॅरम एकदम कसा तरी फुटला आहे, कोणाची गोटी कोणाच्या भोकात असे सांगता येणार नाही असे राज यांनी म्हटले. यासंबधी आपण लवकरच आयोजित मनसेच्या मेळाव्यात सविस्तर बोलू असेही स्पष्ट केले. राज यांच्याबरोबर यावेळी मनसेचे बाबू वागसकर तसेच स्थानिक पदाधिकारी उपस्थित होते.