ओतूर : नगर कल्याण महामार्गावरील पिंपळगावजोगे फाट्याजवळ (ता.जुन्नर) येथे रविवारी सकाळी सव्वाआठच्या सुमारास कल्याणच्या दिशेने येणारी कार व नगरच्या दिशेने येणारी बस यांचा समोरासमोर भीषण अपघात झाला. या अपघातामध्ये दोन महिला जागीच ठार झाल्या, तर पुणे येथे उपचारांदरम्यान २ महिलांचा मृत्यू झाला. एक जण गंभीर जखमी आहे. टेम्पो ट्रॅव्हलमधील ४ ते ५ जण किरकोळ जखमी झाल्याचे ओतूर पोलिस स्टेशनचे सहायक पोलिस निरीक्षक लहू थाटे यांनी ही माहिती दिली.
अपघाताची माहिती समजताच, स्थानिक ग्रामस्थ व ओतूर पोलिसांनी घटनास्थळी धाव घेतली. गंभीर रुग्णांना आळेफाटा येथील हॉस्पिटलमध्ये हलवले. अपघात इतका भीषण होता की, कारचा चक्काचूर झाला. याच गाडीतील भाग्यश्री गायकर (वय १८, रा.कळंब, ता.अकोले. जि.अहमदनगर) व कुसुम मारुती शिंगोटे (वय ५५, रा.बदगी बेलापूर, ता.अकोले जि.अहमदनगर) यांचा जागीच मृत्यू झाला. उपचारांदरम्यान सविता साहेबराव गायकर (वय ३८, रा.कळंब ता.अकोले. जि.अहमदनगर) व सुनीता कारभारी हाडवळे (वय ५७ वर्षे, रा.लिंगदेव ता.अकोले जि.अहमदनगर) यांचा मृत्यू झाला. साहील गायकर (वय २२, चालक), साहेबराव गायकर (वय ४२) गंभीर जखमी झाले असून, त्यांच्यावर उपचार सुरू आहेत. टेम्पो ट्रॅव्हलमधील ४ ते ५ लोक किरकोळ जखमी झाले आहेत.