पुणे : तिच्याशी त्याचा तीन वर्षांपूर्वी संबंध आला. विवाहित असतानाही तिच्या प्रेमापाेटी तिला घरही घेऊन दिले. मात्र, स्वत:च्या संसारात ती करत असलेली ढवळाढवळ थांबवण्यासाठी त्याने तिचा गळा दाबून खून केला आणि तिने गळफास घेऊन आत्महत्या केल्याचे सांगत ससून रुग्णालयात दाखल केले. मात्र, शवविच्छेदनातून उघड झालेल्या प्रकारानंतर काेंढवा पाेलिसांनी पती-पत्नीविरुद्ध खुनाचा गुन्हा दाखल केला. रईस हनिफ शेख (वय ४०) आणि शबाना रईस शेख (वय ३५, रा. शिवनेरीनगर, कोंढवा) अशी गुन्हा दाखल केलेल्या पतीपत्नीची नावे आहेत. फातीमाबी शेख (वय ३४, रा. शिवनेरीनगर, कोंढवा) असे खून झालेल्या महिलेचे नाव आहे.
याबाबत सहायक पोलिस निरीक्षक विश्वास भाबड यांनी कोंढवा पोलिस ठाण्यात फिर्याद दिली आहे. हा प्रकार कोंढव्यातील शिवनेरीनगरमधील गल्ली नं. २३ मध्ये शुक्रवारी सकाळी ६.४५ ते ८.३० दरम्यान घडला. याबाबत पोलिसांनी दिलेल्या माहितीनुसार, रईस शेख हा मजुरी काम करतो. त्याचे सुमारे १२ वर्षांपूर्वी लग्न झाले आहे. सुमारे ३ वर्षांपूर्वी त्याचे फातीमाबी शेख हिच्याबरोबर प्रेमसंबंध निर्माण झाले.
त्याने आपल्या घरापासून काही अंतरावर तिला घर घेऊन दिले होते. फातीमाबीचा त्यांच्या संसारावर हस्तक्षेप वाढत होता. त्यातून त्यांच्यात वादावादी सुरू झाली. शुक्रवारी सकाळी अशीच त्यांच्यात वादावादी झाली असताना रईस याने तिला मारहाण करून तिचा गळा दाबला. त्यात तिचा मृत्यू झाला. त्यानंतर त्यांनी तिला घेऊन तसेच ससून रुग्णालयात नेले. तेथे त्यांनी शेख हिने गळफास घेतल्याचे खोटेच डॉक्टरांना सांगितले. डॉक्टरांनी तिचा मृत्यू झाल्याचे घोषित केले.
पोलिसांनी घटनास्थळावरील परिस्थिती, साक्षीदारांकडे केलेली चौकशी यावरून त्यांना संशय आला. शेख हिचा केलेला इन्क्वेस्ट पंचनामा, डॉक्टरांनी दिलेले ॲडव्हान्स सर्टिफिकेटमध्ये नमूद केलेले कारण याची चौकशी केल्यावर दोघांनी गळा दाबून खून केल्याचे निष्पन्न झाले. त्यानंतर पोलिसांनी फिर्यादी होऊन दोघांवर खुनाचा गुन्हा दाखल केला आहे. पोलिस उपनिरीक्षक सोनवणे तपास करीत आहेत.