मुलींचे अपहरण; एकीवर बलात्कार

शिरापूर (ता. दौंड) येथील आदिवासी समाजाच्या अडीच आणि पाच वर्षांच्या दोन मुलींचे अपहरण करून त्यातील एका पाच वर्षांच्या मुलीवर

लोकमत न्यूज नेटवर्कदेऊळगावराजे : शिरापूर (ता. दौंड) येथील आदिवासी समाजाच्या अडीच आणि पाच वर्षांच्या दोन मुलींचे अपहरण करून त्यातील एका पाच वर्षांच्या मुलीवर बलात्कार करण्यात आला असल्याची माहिती दौंड पोलिसांनी दिली असून, अज्ञात इसमाविरुद्ध बाल लैंगिक अत्याचार प्रतिबंधात्मक कायद्यांतर्गत गुन्हा दाखल करण्यात आला आहे.शिरापूर येथे उपजीविकेसाठी आलेल्या कातकरी समाजातील या दोन अल्पवयीन मुलींचे अपहरण करून बलात्कार झाल्याची तक्रार दौंड पोलीस स्टेशन येथे देण्यात आली असल्याची माहिती ठाणे अंमलदार मांजरे यांनी दिली. पीडित मुलींच्या आईचा गेल्या पाच ते सहा दिवसांपूर्वी अज्ञात जनावरांच्या दंशाने मृत्यू झाला आहे. त्यांचे वडील कामनिमित्त बाहेर गेलेले असताना, त्यांच्या गावकडील एक अज्ञात इसम वडापाव खाण्यासाठी या दोघींना सिद्धटेक (ता. कर्जत) येथे घेऊन गेला असल्याचे मुलींच्या आजीने वडिलांना सांगितले. तेव्हा त्या मुली तेथे आढळून आल्या नाहीत. मुलींच्या वडिलांनी अधिक शोधाशोध केली असता, त्यांना या मुली भांबोरा (ता. कर्जत) परिसरातील पवारवस्ती येथे उसाच्या शेताशेजारी आढळून आल्या, त्यानंतर त्या मुलींना रुग्णवाहिकेतून दौंड येथील उपजिल्हा रुग्णालयात आणले त्यानंतर अधिक उपचारसाठी त्यांना पुणे येथील ससून रुग्णालयात पाठविण्यात आले. पाच वर्षीय मुलीवर बलात्कार झाला असल्याचे निष्पन्न झाले आहे.सदर गुन्ह्याची फिर्याद अज्ञात इसमाविरुद्ध पीडित मुलींच्या वडिलांनी दौंड पोलीस स्टेशन येथे दिली आहे. पुढील तपास पोलीस उपनिरीक्षक संजय निलपत्रेवार करीत आहेत.