साडेतीन लाखांचा माल गोडाऊन उचकटून लंपास

पुणे-सासवड राज्यमार्गालगत असलेल्या एका गोडाऊनचे लोखंडी शटर उचकटून चोरट्यांनी ३ लाख ६१ हजार ३८२ रुपये किमतीचे ९८ सबमर्सिबल व सेंट्रीफ्युगल पंप चोरून नेले आहेत.

लोणी काळभोर : पुणे-सासवड राज्यमार्गालगत असलेल्या एका गोडाऊनचे लोखंडी शटर उचकटून चोरट्यांनी ३ लाख ६१ हजार ३८२ रुपये किमतीचे ९८ सबमर्सिबल व सेंट्रीफ्युगल पंप चोरून नेले आहेत.एंजल पंप प्रायव्हेट लिमिटेड राजकोट (गुजरात) कंपनीच्या वडकी (ता. हवेली) येथील गोडाउनमध्ये साठा करून ठेवण्यात आलेल्या मालाची देखभाल करणारे व कंपनीचे एजंट मनोज अरविंद पटवर्धन (रा. त्रिदेव अपार्टमेंट, मॉडर्न कॉलनी, पौड रोड, कोथरूड, पुणे) यांनी यांनी या प्रकरणी फिर्याद दिली आहे. पोलिसांनी दिलेल्या माहितीनुसार, संतोष गायकवाड यांचे मालकीचे १०वा मैल, वडकी (ता. हवेली) येथे गोडाउन आहे. त्यामध्ये कंपनीचे पाणी उपसण्यासाठी वापरण्यात येणारे सबमर्सिबल व सेंट्रीफ्युगल पंपसाठा करण्यात येतो. मागणीप्रमाणे त्याचे वितरण केले जाते.मंगळवारी (दि. १६) सायंकाळी ७च्या सुमारास काम संपल्यानंतर नेहमीप्रमाणे गोडाउन बंद करण्यात आले. बुधवारी (दि. १७) सकाळी ९.४५च्या सुमारास अकाउंटंट विजय येवले हे कर्मचाऱ्यांसमवेत गोडाउन उघडण्यासाठी आले, त्या वेळी त्यांना गोडाउनचे लोखंडी शटर उचकटलेले दिसले. त्यांनी तत्काळ ही बाब पटवर्धन यांना कळवली. ते आल्यानंतर गोडाउनमध्ये ठेवण्यात आलेल्या मालाची पाहणी केली असता ३ लाख ६१ हजार ३८२ रुपये किमतीचे ९८ सबमर्सिबल व सेंट्रीफ्युगल पंप चोरून नेल्याचे त्यांना लक्षात आले. याप्रकरणी उरुळी देवाची दूरक्षेत्रात फिर्याद देण्यात आली आहे. पोलीस हवालदार आर. एल. मोहरकर पुढील तपास करीत आहेत. (वार्ताहर)