मंचर : पुणे-नाशिक महामार्गावर गायमुख-अवसरी फाटा येथे अज्ञात वाहनाने दुचाकीला धडक दिल्याने तरुणाचा जागेवरच मृत्यू झाल्याची घटना शुक्रवारी घडली. अक्षय साळुराम राजगुरू (वय २०, रा. पिंपळगाव खडकी, ता. आंबेगाव) असे अपघातात ठार झालेल्या तरुणाचे नाव आहे.मंचर पोलिसांनी दिलेल्या माहितीनुसार : भोरवाडी-गायमुख येथे मित्राला सोडून अक्षय राजगुरू त्याच्या दुचाकीवरून मंचरकडे येत होता. गायमुख-अवसरी फाटा येथे तो आला असता एका अज्ञात वाहनाने त्याच्या मोटारसायकलाला धडक दिली. या अपघातात अक्षय गंभीर जखमी झाला. मंचर येथील रुग्णवाहिकाचालक अमित काटे यांच्या रुग्णवाहिकेतून तातडीने अक्षयला मंचर उपजिल्हा रुग्णालयात वैद्यकीय उपचारासाठी आणले. मात्र उपचारापूर्वीच त्याचा मृत्यू झाल्याचे डॉक्टरांनी जाहीर केले.अक्षय राजगुरू पिंपळगाव येथील प्रसिद्ध छायाचित्रकार साळुराम राजगुरू यांचा मोठा मुलगा आहे. अपघाताची फिर्याद मृत अक्षय राजगुरू याचा चुलतभाऊ नीलेश बाळू राजगुरू यांनी मंचर पोलीस ठाण्यात दिली. पोलीस कर्मचारी सागर गायकवाड यांनी अपघाताचा पंचनामा केला असून अज्ञात वाहनाच्याविरोधात अपघाताला कारणीभूत ठरल्याचा गुन्हा दाखल केला आहे. मृत अक्षय राजगुरू याच्या मागे आई-वडील, भाऊ असा परिवार आहे.
वाहनाच्या धडकेत तरुणाचा मृत्यू
By लोकमत न्यूज नेटवर्क | Published: May 06, 2018 2:27 AM