मंचर: शाळेत जाणाऱ्या अल्पवयिन मुलीची छेड काढणाऱ्यास आईने व भावाने जाब विचारला असता त्यांना मारहाण करण्यात आल्याची घटना आंबेगाव तालुक्यातील पेठ येथे सोमवारी घडली. या प्रकरणी आरोपीवर गुन्हा दाखल करण्यात आला आहे.
पोलिसांनी दिलेल्या माहितीनुसार किशोर दत्तात्रय रागमहाले असे आरोपीचे नाव आहे. रागमहाले हा एका अल्पवयिन मुलीचा शाळेत जातांना पाठलाग करत होता. तसेच तिला त्रास देऊन रोज तिचा विनयभंग करत होता. रोजच्या त्रासाला कंटाळून हा प्रकार मुलीने शाळेतील शिक्षकांना तसेच आई-वडील, भाऊ यांना सांगितला होता. त्यावेळी रागमहाले याला समज देण्यात आली. लॉकडाऊन मध्ये शाळा बंद असल्याने ही मुलगी गावातील क्लासला जात होती. त्यावेळीही किशोर रागमहाले हा नेहमी पाठलाग करून तीच्याशी लगट करण्याचा प्रयत्न करत होता. रविवारी सकाळी ही मुलगी घरातून गावात भाजीपाला आणण्यासाठी निघाली होती. वेताळबुवा चौक येथून जात असताना किशोर रागमहाले हा त्याच्या ताब्यातील मोटरसायकलवरून पाठलाग करत आला. तिला त्रास देत त्याने तिचा विनयभंग केला. मुलगी घाबरून पळत घरी गेली. त्यावेळीही रागमहाले मोटरसायकलवरून पाठलाग करत तिच्या घराजवळ येऊन थांबला. या मुलीने हा प्रकार घरात जाऊन सांगितला. तिच्या आई आणि भावाने रागमहाले यास विचारणा केली असता त्याने शिवीगाळ करण्यास सुरुवात केली. त्याठिकाणी असलेले खोऱ्याचे दांडके घेऊन त्याने मुलीचा भाऊ याच्या डाव्या हातावर मारून दुखापत केली. तुम्हाला जिवंत सोडणार नाही. अशी धमकी देऊन तो तिथून निघून गेला. याप्रकरणी संबंधित अल्पवयीन मुलीने मंचर पोलिस ठाण्यात फिर्याद दिली असून पोलिसांनी किशोर दत्तात्रय रागमहाले याच्याविरुद्ध गुन्हा दाखल केला आहे.