टेम्पोची दुचाकीला धडक; युवक ठार

सासवड-आंबोडी रस्त्यावर टेम्पोला दुचाकीने जोरदार धडक दिल्याने दुचाकीस्वार युवक आकाश दत्तात्रय कुंभारकर (वय २३) हा जागीच ठार झाला

नारायणपूर : सासवड-आंबोडी रस्त्यावर टेम्पोला दुचाकीने जोरदार धडक दिल्याने दुचाकीस्वार युवक आकाश दत्तात्रय कुंभारकर (वय २३) हा जागीच ठार झाला. त्याच्या समवेत असलेली आरती सोमनाथ गायकवाड ही तरुणी गंभीर जखमी झाली आहे.टेम्पो (के.ए. २२ ए ७६९८) यल्लप्पा महादेव जाधव (रा. कावळेवाडी पोष्ट बिजनरनी बेळगाव) हे सणसवाडी येथून साखर फॅक्टरीचा माल घेऊन उरुळी कांचनहून सासवड मार्गे येत असताना आंबोडी गावाच्या हद्दीत भरधाव वेगात दुचाकी येऊन टेम्पोच्या उजव्या बाजूस जोरदार धडकली. दुचाकीस्वार गाडीखाली अडकला व त्याच्यासमवेत असणारी तरुणी बाजूला फेकली गेली. सदर घटना सहा वाजण्याच्या सुमारास घडली. वरील दोघांना तातडीने स्थानिक नागरिकांच्या सहकार्याने रिक्षात घालून सासवड येथील खासगी रुग्णालयात आणले. टेम्पो चालकास ताब्यात घेण्यात आले आहे. मृतदेह शवविच्छेदनासाठी सासवड ग्रामीण रुग्णालयात आणण्यात आला आहे. दुचाकीचा नंबर मिळाला नसल्याचे पोलिसांनी सांगितले. ठाणे अंमलदार एम. के. मणेरी यांनी माहिती दिली. पुढील तपास पोलीस उपनिरीक्षक आबासाहेब टापरे करीत आहेत.