पुणे : वनाझ ते शिवाजीनगर धान्य गोदाम (सिव्हिल कोर्ट) या पुणेमेट्रोच्या रिच २ मार्गातील व्हायाडक्टचे काम पूर्ण झाले आहे. या मार्गिकेवरील डेक्कन, छत्रपती संभाजी महाराज उद्यान, पुणे महापालिका आणि सिव्हिल कोर्ट या स्थानकांची कामे गतीने पूर्ण करण्यात येत आहेत.
त्यामुळे लवकरच वनाज ते सिव्हिल कोर्टपर्यंतचा मेट्रो प्रवास सुरू होईल, असा विश्वास महामेट्रोचे संचालक डॉ. ब्रिजेश दीक्षित यांनी व्यक्त केला.
वनाज ते सिव्हिल कोर्टदरम्यानचे पिलर यापूर्वीच उभे राहिले असून, रेल्वे रूळ टाकण्यासाठीच्या सेग्मेंट व व्हायाडक्टचे कामही पूर्ण झाले आहे. या मार्गिकेवर आता विद्युतीकरणाची कामे हाती घेण्यात आली आहेत. या कामांची पाहणी नुकतेच डॉ. ब्रिजेश दीक्षित यांनी केली. या स्थानकांसोबतच अन्य कामेही वेगाने पूर्ण करून येत्या काही महिन्यांत वनाज ते सिव्हिल कोर्टपर्यंत मेट्रो धावू शकेल, असा विश्वासही त्यांनी व्यक्त केला.
वनाज ते सिव्हिल कोर्ट मेट्राे मार्गाचे काम गतीने सुरू आहे. यात गरवारे ते सिव्हिल कोर्ट दरम्यान सध्या रूळ (ट्रँक) आणि विद्युत खांब, सिग्नल लावण्याचे काम सुरू आहे. स्थानकांचेही काम गतीने केले जात आहे. लवकरच ते पूर्ण होईल आणि वनाज ते सिव्हिल कोर्ट या मार्गावर पुणेकरांना मेट्रोचा लाभ घेता येईल.
मेट्राेची सद्यस्थिती
पुणे मेट्रोच्या वनाज ते रामवाडी व पिंपरी-चिंचवड ते स्वारगेट या दोन्ही मार्गांची एकूण लांबी ३३.२ कि.मी. असून यात ३० स्थानके आहेत. यातील ५ स्थानके भूमिगत व २५ स्थानके उन्नत आहेत. पुणे मेट्रोने यात रिच १ (पिंपरी चिंचवड स्थानक ते सिव्हिल कोर्ट स्थानक), रिच २ (वनाझ स्थानक ते सिव्हिल कोर्ट स्थानक), रिच ३ (रामवाडी स्थानक ते सिव्हिल कोर्ट स्थानक) त्याचबरोबर भूमिगत मार्ग १ (स्वारगेट स्थानक ते सिव्हिल कोर्ट स्थानक) आणि भूमिगत मार्ग २ (रेंज हिल स्थानक ते सिव्हिल कोर्ट स्थानक) अशी कामे केली आहेत. यातील वनाज ते सिव्हिल कोर्ट या रिच २ मार्गावरील पूल टाकण्याचे काम पूर्ण झाले असून हे अंतर ७.५०५ कि.मी. आहे.
महामेट्रोचे व्यवस्थापकीय संचालक डॉ. ब्रिजेश दीक्षित यांनी मेट्रो अधिकारी व कर्मचाऱ्यांचे अभिनंदन केले आहे. केंद्र व राज्य सरकार, पुणे महापालिका अन्य सरकारी कार्यालय व प्रामुख्याने पुणेकर नागरिक यांच्या सहकार्यामुळे मेट्रोच्या कामाला गती देणे शक्य होत आहे, असे दीक्षित यांनी सांगितले.