लोकमत न्यूज नेटवर्क
पुणे : लिजंड्स स्पोर्ट्स क्लबतर्फे आयोजित ‘लिजंड्स करंडक’ आंतर क्लब (१४ आणि १६ वर्षाखालील गट) टी-२० स्पर्धेत रोहितराज युवा क्रिकेट अकादमी आणि लिजंडस् स्पोर्ट्स क्लब संघांनी विजय मिळवले.
मुंढव्याच्या चंचलाताई संदीप कोद्रे क्रीडा संकुलातील मैदानावर सुरू असलेल्या या स्पर्धेत १४ वर्षांखालील गटात आदित्य वाघमारे याच्या कामगिरीच्या जोरावर रोहितराज युवा क्रिकेट अकादमीने लिजंड्स स्पोर्ट्स क्लबचा ३ गडी राखून पराभव केला.
पहिल्यांदा फलंदाजी करताना लिजंड्स स्पोर्ट्स क्लबने १९ षटकांत ८ गडी गमावून ९९ धावा केल्या. यात रूद्रप्रताप सिंग (२७ धावा) व स्वराज बंदीचड (१५ धावा) यांनी संघाला ९० धावांचा टप्पा गाठून दिला. हे आव्हान रोहितराज युवा क्रिकेट अकादमीने १९ षटकांत व ७ गडी गमावून पूर्ण केले. आदित्य वाघमारेने ३३ धावा फटकावून विजयात मोलाचा वाटा उचलला.
१६ वर्षांखालील गटाच्या सामन्यात हरी बंडीबोडेच्या भेदक गोलंदाजीच्या जोरावर लिजंड्स स्पोर्ट्स क्लबने रोहितराज युवा क्रिकेट अकादमीचा ५ गडी राखून सहज पराभव केला. पहिल्यांदा फलंदाजी करताना रोहितराज युवा संघाने २० षटकात ९ गडी गमावून १२१ धावा केल्या. लिजंडस् क्लबच्या हरी बंडीबोडेने १३ धावात ३ टिपत चमकदार गोलंदाजी केली. लिजंड्स स्पोर्ट्स क्लबने हे आव्हान १७.१ षटकांत व ५ गडी गमावून पूर्ण केले. अयान शेख याने ४८ धावा करून विजयात महत्त्वाची भूमिका बजावली.