धायरी : थांब जरा मला तुझ्याशी बोलायचे आहे, तू मला उद्या भेटशील का असं म्हणत महिलेचा हात धरून विनयभंग केल्याची प्रकार नऱ्हे येथे घडला आहे. याबाबत २२ वर्षीय विवाहित महिलेने सिंहगड रस्ता पोलीस ठाण्यात तक्रार दाखल केली असून याप्रकरणी मंगेश विष्णू दीक्षित (वय:३६ वर्षे, रा. स्वामी नगर आंबेगाव पठार, पुणे ) याच्याविरुद्ध गुन्हा दाखल करून पोलिसांनी अटक केली आहे.
याबाबत सिंहगड रस्ता पोलीसांनी दिलेली माहिती अशी की, तक्रारदार महिला ह्या नऱ्हे येथील एका खासगी कंपनीत कामास आहेत. त्याच कंपनीत काम करीत असणारा सुपरवायझर मंगेश दीक्षित हा डिसेंबर २०२१ पासून वेळोवेळी तक्रारदार महिलेला माझ्याशी फ्रेंडशिप करशील का, आय लव्ह यू असं म्हणून मनाला लज्जा उत्पन्न होईल असे वागत होता. तसेच २१ मार्च २०२२ रोजी दुपारी १ वाजता तक्रारदार महिलेचा पाठलाग करून त्या राहत असणाऱ्या इमारतीच्या जिन्यामध्ये महिलेचा हात धरून थांब मला जरा तुझ्याशी बोलायचे आहे, तू मला उद्या भेटशील का, असं म्हणाला. त्यामुळे महिलेने वारंवार होणाऱ्या या त्रासाला कंटाळून सिंहगड रस्ता पोलीस ठाण्यात तक्रार दाखल केली आहे. याबाबत सिंहगड रस्ता पोलीस ठाण्याच्या सहायक पोलिस निरीक्षक प्रतिभा तांदळे व पोलीस अंमलदार सतीश पाटील यांनी आरोपी विरुद्ध गुन्हा दाखल करून २४ तासात दोषारोपपत्र न्यायालयात सादर केले आहे.