लोकमत न्यूज नेटवर्कपुणे : कर्वेनगर येथील मावळेआळीत एका तरुणाचा धारदार शस्त्राने गळा चिरून खून केल्याची घटना सोमवारी दुपारी घडली. रक्ताच्या थारोळ्यात पडलेल्या अवस्थेत त्याचा मृतदेह आढळला. खुनाची माहिती मिळताच वारजे पोलिसांनी घटनास्थळी धाव घेतली. तरुणाची ओळख रात्री उशिरापर्यंत पटलेली नव्हती. तरुणाचे वय अंदाजे २५ वर्षे असून, मावळेआळीतील एका दहा बाय दहाच्या पडक्या खोलीत गळा चिरलेल्या अवस्थेत त्याचा मृतदेह आढळला. पाच ते सहा तासांपूर्वी त्याचा खून झाला असण्याचा अंदाज व्यक्त करण्यात आला. मात्र या तरुणाची अद्याप ओळख पटलेली नाही. जी खोली फारशी वापरात नव्हती, तिथे काही जण दारू पिण्यासाठी येतात. सोमवारी दुपारी पडीक खोलीत दारू पिण्यासाठी काहीजण आले होते. त्यांच्यात झालेल्या वादावादीतून तरुणाचा तीक्ष्ण शस्त्राने गळा चिरून त्याला जीवे ठार मारण्यात आले. एका नागरिकाने या घटनेची माहिती पोलिसांना दिली. वारजे पोलीस ठाण्याचे वरिष्ठ पोलीस निरीक्षक बाजीराव मोळे यांनी घटनास्थळी भेट दिली. रात्री उशिरा वारजे पोलीस ठाण्यात खुनाचा गुन्हा दाखल करण्यात आला आहे. पोलीस निरीक्षक मोळे तपास करीत आहेत.
मावळेआळीत तरुणाचा गळा चिरून खून
By admin | Published: May 30, 2017 3:06 AM