पुणे : ऑर्डर कॅन्सल केल्याने रागाच्या भरात झोमॅटो बॉयने हॉटेल मालकाच्या डोक्यात लोखंडी स्टॅन्ड मारून लाथाबुक्क्यांनी बेदम मारहाण केली. ही घटना बाणेर रोडवरील एका हॉटेलमध्ये घडली. याप्रकरणी, विशाल विजय अग्रवाल (वय ४०, रा. अ‍ॅक्सिस स्ट्रीट, बाणेर रोड) यांनी फिर्याद दिली आहे. त्यानुसार रामेश्वर वाघाजी तडसे (वय ३५, रा. हिंजवडी) व त्याच्या साथीदारांच्या विरुद्ध चतुःश्रृंगी पोलिस ठाण्यात गुन्हा दाखल करण्यात आला आहे.
तडसे हे हे हॉटेल व्यवसायिक आहेत. त्यांना झोमॅटोवरून ऑर्डर आली होती. ती ऑर्डर रामेश्वरला दिली होती. त्यानुसार अग्रवाल यांनी त्याला फोन केला. मात्र त्याने फोन उचलला नाही. याबाबत अग्रवाल यांनी झोमॅटोला कळवले होते. त्यानुसार त्यांनी दुस-या रायडरला ऑर्डर पोहच करण्यासाठी हॉटेलला पाठवले होते. दरम्यान रामेश्वर हा त्या ठिकाणी आला. माझी ऑर्डर का कॅन्सल केली? असे म्हणत शिवीगाळ करून अग्रवाल यांच्या डोक्यात लोखंडी स्टॅन्ड मारून जखमी केले. त्याच्या साथीदारांनी लाथाबुक्क्यांनी मारहाण करून हॉटेलच्या दरवाज्याची तोडफोड केली.