सुसाट टेम्पोने रस्त्यावरून चालणाऱ्या कामगारांना उडवले: एक ठार तर तीन गंभीर 

प्रत्यक्षदर्शींनी चांगलाच चोप देत टेम्पो चालकाला पोलिसांच्या ताब्यात दिले आहे

मधुकर ठाकूर

उरण : चिर्ले गावाजवळ असलेल्या गंगा रसोई हॉटेल समोरच्या सर्व्हिस रोडवरुन चालत असलेल्या चार वाटसरूंना भरधाव वेगाने येणाऱ्या एका टेम्पोने उडवले.गुरुवारी (२४) घडलेल्या अपघातात एक इसम ठार झाला असुन तीन इसम गंभीररीत्या जखमी झाले आहेत. जखमींवर एमजीएम रुग्णालयात उपचार सुरू असल्याची माहिती उरण पोलिसांनी दिली.

पोलिसांनी दिलेल्या माहितीनुसार गुरुवारी रात्री ८ ते ८.३० वाजताच्या सुमारास काही कामगार कामावरून सुटल्यावर चिर्ले गावाजवळ असलेल्या गंगा रसोई हॉटेल समोरच्या सर्व्हिस रोडवरुन चालत घरी परतत होते.यावेळी नियंत्रण सुटलेल्या सुसाट टेम्पोने रस्त्यावरून चालत असलेल्या कामगारांना जोरदार धडक दिली.टेम्पोंच्या जोरदार धडकेत चार जण गंभीररीत्या जखमी झाले आहेत.यापैकी उपचारादरम्यान एकाचा मृत्यू झाला आहे.तर उर्वरित गंभीर जखमींवर कामोठे येथील एमजीएम रुग्णालयात उपचार सुरू असल्याची माहिती उरण पोलिसांनी दिली. दरम्यान प्रत्यक्षदर्शींनी चांगलाच चोप देत टेम्पो चालकाला पोलिसांच्या ताब्यात दिले आहे. याप्रकरणी  उरण पोलिस अधिक तपास करीत आहेत.