काका-पुतण्याचा कार अपघातात मृत्यू

मोहोपाडा नवीन पोसरी येथील तातरे कुटुंबीय कारमधून गुजरातमधील सोरटी सोमनाथ येथे देवदर्शनाला जात असताना कारला झालेल्या अपघातात काका-पुतण्या जागीच ठार झाले

मोहोपाडा : मोहोपाडा नवीन पोसरी येथील तातरे कुटुंबीय कारमधून गुजरातमधील सोरटी सोमनाथ येथे देवदर्शनाला जात असताना कारला झालेल्या अपघातात काका-पुतण्या जागीच ठार झाले, तर कारमधील चौघे जण गंभीर जखमी झाल्याची घटना घडली.नवीन पोसरी येथील तातरे कुटुंबीय त्यांच्या स्विफ्ट कारमधून सोरटी सोमनाथ येथे शिवलिंगाच्या दर्शनाला जात असताना, गुजरातमध्ये कारचालकाचा स्टेअरिंंगवरील ताबा सुटल्याने कार समोर उभ्या असलेल्या कंटेनरवर जाऊन जोरदार आदळली.या अपघातात कारमधील महादेव गंगाराम तातरे (६७) व त्यांचा पुतण्या धनाजी पांडुरंग तातरे (४२) हे दोघे जागीच ठार झाले. तर कारमधील धनाजीचे वडील पांडुरंग तातरे, मुलगी रेखा प्रदीप रसाळ, सुरेखा व वाहनचालक हे गंभीर जखमी झाल्याने त्यांना रुग्णालयात उपचारार्थ दाखल करण्यात आले. त्यानंतर जखमींना पनवेल येथील लाइफ लाइन रुग्णालयात दाखल करण्यात आले आहे.नवीन पोसरीतील तातरे कुटुंबातील दोघांचा जागीच मृत्यू झाल्याने, तातरे कुटुंबावर दु:खाचे सावट पसरले आहे. अपघातानंतर महादेव तातरे व धनाजी तातरे यांचे मृतदेह अंत्यसंस्काराकरिता नवीन पोसरी येथील राहत्या घरी आणण्यात आले. यानंतर त्यांच्या मृतदेहावर पाताळगंगा पुलाजवळील स्मशानभूमीवर अंत्यसंस्कार करण्यात आले. या घटनेमुळे तातरे कु टुंबावर शोककळा पसरली आहे. या वेळी विविध संस्थांचे पदाधिकारी, राजकारणी मंडळी, इतर नातेवाईक व मित्रमंडळी यांनी मोठ्या संख्येने गर्दी केली होती.