पनवेलमध्ये सर्वात कमी मतदान

महाराष्ट्र निवडणूक २०१९: रायगड जिल्ह्याच्या आकडेवारीत ५५.३ टक्के नोंद; लोकसभेपेक्षाही एक टक्का घसरला

- वैभव गायकर

पनवेल : महाराष्ट्रातील सर्वात मोठा व मेट्रोपॉलिटन मतदारसंघ म्हणून पनवेल विधानसभा मतदारसंघ आहे. मात्र, जिल्ह्याच्या इतर मतदारसंघाच्या तुलनेत पनवेलमधील मतदानाची टक्केवारी ढासळली आहे. विशेष म्हणजे, लोकसभेच्या निवडणुकांच्या वेळी झालेल्या मतदानापेक्षाही हे मतदान एक टक्क्यांनी कमी झाल्याचे दिसून येत आहे. लोकसभा निवडणुकी वेळी पनवेल विधानसभा मतदारसंघात ५५.३ टक्के मतदान झाले होते. तर आता विधानसभेसाठी केवळ ५४.१३ टक्के मतदान झाले आहे.

रायगड जिल्ह्यात १८८ पनवेल, १८९ कर्जत, १९० उरण, १९१ पेण, १९२ अलिबाग, १९३ श्रीवर्धन, १९४ महाड आदी मतदारसंघाचा समावेश आहे. या मतदारसंघापैकी पनवेल मतदारसंघ सर्वात मोठा आहे. तब्बल पाच लाख ५७ एवढी मतदारसंख्या या मतदारसंघात आहे. पनवेल मतदारसंघ या वेळी मतदारांचा बहिष्कार व नोटा मोहिमेमुळे चांगलाच चर्चेत आला.

मतदारसंघातील रस्ते, पाणी आदी प्रश्न सुटत नसल्याने नागरिकांनी ही मोहीम छेडली होती. विशेषत: सिडको नोडमधील मतदारांनी याबाबत नाराजी व्यक्त केली होती. पनवेल मतदारसंघात भाजपचे प्रशांत ठाकूर व शेकापचे हरेश केणी यांच्यात थेट लढत आहे. वर्षभरापासून भाजपने मतदारसंघात कॅम्पेनिंग सुरू केले होते. प्रशांत ठाकूर यांचा दांडगा जनसंपर्क व कार्यकर्त्यांची फौज पाहता सहजरीत्या मतदारांपर्यंत पोहोचणे त्यांना सहज शक्य झाले त्या तुलनेत शेकापचे हरेश केणी यांची उमेदवारी उशिरा जाहीर झाल्याने सर्वच स्तरातील मतदारांपर्यंत पोहोचता आले नाही.

पनवेल विधानसभा मतदारसंघात एकूण दहा उमेदवार निवडणूक रिंगणात आहेत. यामध्ये हरेश केणी नावाचे दोन उमेदवारांचा समावेश आहे. अपक्ष डमी उमेदवार हरेश केणी आणि शेकापचे हरेश केणी यांची किती मते विभाजन करतो, याबाबतही उत्सुकता आहे. पनवेल मतदारसंघाला लागून असलेल्या उरण मतदारसंघात मात्र जिल्ह्यात सर्वात जास्त मतदान उरण मतदारसंघात झाले. उरणमध्ये ७४.३२ टक्के मतदानाची नोंद करण्यात आली आहे. रायगड जिल्ह्यातील सात मतदारसंघातील उरणची मतदानाची टक्केवारी सर्वात जास्त आहे.

विधानसभा निवडणुकीतील टक्के वारी

मतदारसंघ- एकूण मतदार- झालेले मतदान- टक्केवारी

१८८ पनवेल   ५,५७,३२४        ३,०१,७०३          ५४.१३ टक्के

१८९ कर्जत     २,८२,२४७       १,९९,८४५          ७०.८१ टक्के

१९० उरण       २,९४,१५१       २,१८,६११           ७४.३२ टक्के

१९१ पेण          ३,०१,८५७      २,१५,१७३          ७१.२८ टक्के

१९२ अलिबाग  २,९४,५८३     २,१३,९०४          ७२.६१ टक्के

१९३ श्रीवर्धन     २,५७,५३२    १,५६,६८२         ६०.८४ टक्के

१९४ महाड       २,८४,३४५    १,९०,४४५         ६६.९८ टक्के

एकूण ६५.८६ टक्के

नोटाबाबत उत्सुकता

पनवेल विधानसभा मतदारसंघात प्राथमिक सुविधा मिळत नसल्याने अनेकांनी नोटा मोहीम सुरू केली होती. सोशल मीडिया, सोसायटीच्या प्रवेशद्वारावर नोटाचे मोठे बॅनर्स झळकत असल्याचे पाहावयास मिळाले. मात्र, मतमोजणीच्या दिवशी नोटाचे चित्र स्पष्ट होणार असल्याने किती मतदारांनी नोटा पर्याय निवडला, याबाबत उत्सुकता असणार आहे.