बाप्पा पावला, सागरी प्रवास झाला स्वस्त; १ सप्टेंबरपासून तिकीट दर कमी

ऐन गणपतीत अलिबाग-कोकणात जाणाऱ्या हजारो भाविकांची गैरसोय दूर होणार

मधुकर ठाकूर

लोकमत न्यूज नेटवर्क, उरण : तीन महिने पावसाळी हंगामात बंद केलेल्या रेवस-भाऊचा धक्का या सागरी जलमार्गावर १ सप्टेंबरपासून प्रवासी बोट सेवा पूर्ववत सुरू होणार आहे. तर भाऊचा धक्का-मोरादरम्यान पावसाळी हंगामात वाढविलेला तिकीट दर २५ रुपयांनी कमी होणार आहे. यामुळे ऐन गणपती सणातच सुरू होणाऱ्या प्रवासी वाहतुकीमुळे अलिबाग-कोकणात जाणाऱ्या हजारो भाविकांची गैरसोय दूर होणार आहे. तसेच मोरा सागरी प्रवासही स्वस्त होणार असल्याने प्रवाशांनाही दिलासा मिळणार आहे.

वारंवार बदलणारे वादळी व खराब, मुसळधार पाऊस, हवामान समुद्रात उठणाऱ्या उंचच उंच लाटा यामुळे खबरदारीची उपाययोजना म्हणून पावसाळी हंगामासाठी दरवर्षी रेवस-भाऊचा धक्का या सागरी जलमार्गावरील प्रवासी वाहतूक बंद ठेवण्यात येते.

या सागरी मार्गावरील तिकीट दर १०० रुपये आहे. तर गेटवे-मांडवा मार्गावरील स्पीड बोट आणि रो-रो बोट सेवा यांच्या तिकीट दरांपेक्षा सर्वसामान्यांना रेवस-भाऊचा धक्का या सागरी जलमार्गावरील प्रवास परवडतो. त्यामुळे हजारो सर्वसामान्य प्रवासी या मार्गावरून प्रवास करतात. बंद ठेवलेली प्रवासी बोट सेवा १ सप्टेंबरपासून सुरू करण्यात येणार असल्याची माहिती मुंबई जलवाहतूक संस्थेचे सेक्रेटरी शराफत मुकादम यांनी दिली.

भाऊचा धक्का-मोरादरम्यान दरवर्षी पावसाळी हंगामात तिकीट दरात वाढ केली जाते. त्यानुसार तिकीट दरात २५ रुपयांची वाढ केली होती. १ सप्टेंबरपासून पावसाळी हंगाम संपुष्टात येणार असल्याने दर कमी करण्यात येणार आहे. यामुळे भाऊचा धक्का-मोरादरम्यान प्रवाशांना तिकिटासाठी आता ८० रुपये मोजावे लागणार असल्याचे शराफत मुकादम यांनी सांगितले.