लोकमत न्यूज नेटवर्कधाटाव : रोहा-कोलाड मार्गावर भरधाव ट्रेलरने रिक्षाटेम्पोला मागून जोरदार धडक दिली. या धडकेत रिक्षाटेम्पोचे नुकसान झाले असून, ट्रेलरचालकाचा ताबा सुटल्यामुळे रस्त्यालगत असलेल्या गॅरेजमधील दोन दुचाकींचा चुराडा झाला. या अपघातात जीवितहानी मात्र टळली असून, नजीकच्या वस्तीत भीतीचे वातावरण निर्माण झाले आहे.मंगळवार, २७ जून रोजी सकाळी १०.४५ वा. रोहा-कोलाड रस्त्यावर वरसेनाक्यावर कोलाडकडून रोह्याकडे जाणाऱ्या रिक्षाटेम्पो क्र . एम. एच. ०६ बी. जी. ४८७ला मागून भरधाव वेगाने येणाऱ्या ट्रेलर क्र . एम. एच. ४६ ए. एफ. ७४४८ने जोरदार धडक दिली. चालकाचा ट्रेलरवरील ताबा सुटल्याने रस्त्यालगत असलेल्या गॅरेजमध्ये बाहेर उभ्या असलेल्या क्र . एम. एच. ०६ बी. बी. ८३५४ व आणखी एका दुचाकीला या ट्रेलरने चिरडले. यामध्ये दोन्ही दुचाकींचे मोठ्या प्रमाणात नुकसान झाले आहे. मात्र, या दुर्घटनेत कोणतीही जीवितहानी झाली नाही. दरम्यानच्या घटनेमुळे रोहा-कोलाड रस्त्यावरील वाहतुकीला अडथळा निर्माण झाल्याने संथ गतीने वाहतूक सुरू होती. या दुर्घटनेबाबत रोहा पोलीस ठाण्यात सायंकाळपर्यंत कोणतीही नोंद झाली नसल्याचे पोलिसांकडून सांगण्यात आले.
ट्रेलरची रिक्षाटेम्पोला धडक
By admin | Published: June 28, 2017 3:31 AM