रोहा उपनगराध्यक्षपदी शिल्पा धोत्रे

रोहा-अष्टमी नगरपरिषदेच्या उपनगराध्यक्ष व दोन स्वीकृत जागांकरिता झालेल्या निवडणुकीत शिल्पा धोत्रे यांची उपनगराध्यक्ष तर स्वीकृत नगरसेवकपदी शहर

रोहा : रोहा-अष्टमी नगरपरिषदेच्या उपनगराध्यक्ष व दोन स्वीकृत जागांकरिता झालेल्या निवडणुकीत शिल्पा धोत्रे यांची उपनगराध्यक्ष तर स्वीकृत नगरसेवकपदी शहर अध्यक्ष सुभाष राजे व मुस्लीम समाज अध्यक्ष महमदशेठ डबीर यांची बिनविरोध निवड करण्यात आली.
मंगळवारी निवडणूक निर्णय अधिकारी रवींद्र बोंबले यांच्याकडे राष्ट्रवादी शहर अध्यक्ष सुभाष राजे, शिक्षण मंडळ उपसभापती अखलाक नाडकर, मुस्लीम समाज रोहा वरचा मोहल्ला अध्यक्ष महमदशेठ डबीर व अमित उकडे या चारजणांनी उमेदवारी अर्ज दाखल केले होते. बुधवारी रोहा नगरपरिषदेच्या द.ग.तटकरे सभागृहात पीठासन अधिकारी तथा नगराध्यक्ष संतोष पोटफोडे यांनी वरील चार उमेदवारांचे अर्ज अवैध असल्याची घोषणा केली. नगरपरिषदेच्या स्वीकृत सदस्यपदाकरिता शहर अध्यक्ष सुभाष राजे व मुस्लीम समाजअध्यक्ष महदमशेठ डबीर यांच्या नावाची घोषणा केली. नगरपरिषदेच्या उपनगराध्यक्ष पदाकरिता ज्येष्ठ नगरसेविका शिल्पा धोत्रे यांचा एकमेव अर्ज दाखल झाल्याने पीठासन अधिकारी संतोष पोटफोडे यांनी उपनगराध्यक्षपदी त्यांच्या नावाची घोषणा केली.
यावेळी सभागृहात विशेष सभेत मुख्याधिकारी प्रकाश पाटील, ज्येष्ठ नगरसेवक अहमद दर्जी, समीर सकपाळ, गटनेते महेंद्र दिवेकर आदी उपस्थित होते. (वार्ताहर)