राजापूर : शहरातील समर्थनगर (भटाळी) येथील सेवानिवृत्त शिक्षक विजयकुमार पंडित यांचे समर्थनगर येथील राहते घर फोडून चोरट्यांनी सुमारे पाच लाखाचे सोने, चांदीचे दागिने लांबविले. ही चाेरी शनिवारी झाली. भर वस्तीत झालेल्या चोरीने राजापूर शहरात एकच खळबळ उडाली आहे. विजयकुमार पंडित हे शनिवारी दुपारी २:३० ते रात्री ९:३० वाजण्याच्या दरम्यान घर बंद करुन कळसवली येथे गेले हाेते. रात्री घरी आल्यानंतर चाेरी झाल्याचा प्रकार त्यांच्या लक्षात आला. त्यांनी घरातील सामानाची तपासणी केली असता साेन्या, चांदीचे दागिने चाेरीला गेल्याचे लक्षात आले. त्यांनी याबाबत राजापूर पाेलिसांना माहिती दिली.
चाेरीची माहिती मिळताच राजापूर पाेलिसांनी घटनास्थळी दाखल हाेत पाहणी केली. चाेरट्यांचा शाेध घेण्यासाठी श्वानपथकालाही पाचारण करण्यात आले हाेते. ही चाेरी माहितीच्याच माणसाने केली असावी, असा संशय व्यक्त हाेत आहे. चाेरट्याने पाळत ठेवून घरात काेणी नसल्याचा फायदा उठवत डल्ला मारल्याचा अंदाज व्यक्त हाेत आहे. याबाबत अधिक तपास राजापूर पाेलिस करत आहेत.