मंडणगड : बातमीदार : गणेशोत्सवाच्या पार्श्वभूमीवर मंडणगड नगरपंचायतीने शहरात वाढणारी वर्दळ, वाहतूक लक्षात घेऊन शहरातील खड्डे बुजवणे, स्वच्छता, दुकानांच्या समोरील गटार स्वच्छता आदी कामे हाती घेतली आहेत. नगरपंचायतीने शहरातील मुख्य चौकात व शहरातील मुख्य रस्त्यावर पडलेले खड्डे काँक्रिटच्या साहाय्याने बुजवून रस्त्यांची डागडुजी केली.
मंडणगड नगरपंचायत मुख्याधिकारी विनोद डवले यांच्या नेतृत्वाखाली नगरपंचायत कर्मचाऱ्यांनी स्वच्छता व्यवस्था व शहरातील अन्य समस्यासंदर्भातील निराकरणासाठी पुढाकार घेतला आहे. गणेशोत्सवातील गर्दी लक्षात घेऊन कोरोना नियमावलीच्या सूचना व्यापाऱ्यांना देणे, पार्किंगची व्यवस्था आदींबाबतही नियोजन करण्यात आले आहे. प्रभागांमधील स्वच्छतेवर अधिक भर देण्याचे नियोजन आहे. नगरपंचायत अखत्यारित येणाऱ्या गांधी चौक व कोंझर येथील पुलांचे स्ट्रक्चरल ऑडिट करून मिळावे, यासाठी नगरपंचायतीतर्फे बांधकाम विभागाला पत्रव्यवहार केला आहे. दरम्यान, शहरातील मुख्य चौक व अन्य मार्गावरील रस्त्यांतील खड्डे बुजवून डागडुजी केल्याने नागरिकांमधून समाधान व्यक्त होत आहे.