तासगाव : गव्हाण (ता. तासगाव) येथे शिवजयंतीच्या कार्यक्रमात डॉल्बीच्या तालावर ठेका धरून माजी उपसरपंच तुकाराम यादव याने तलावर घेऊन डान्स केला. हा व्हिडिओ सोशल मीडियातून व्हायरल झाला. त्यानंतर पोलिसांनी या घटनेची तात्काळ दखल घेत तलवार जप्त करून यादववर गुन्हा दाखल केला.
याबाबत अधिक माहिती अशी, गव्हाण येथे शिवजयंतीचे आयोजन करण्यात आले होते. या कार्यक्रमात शुक्रवारी रात्री डॉल्बीच्या दणदणाटात तुकाराम यादव याच्यासह कार्यकर्त्यांचा धांगडधिंगा सुरू होता. यावेळी यादव याने हातात तलवार घेऊन नाच केला. नाच करतानाचे शूटिंग घेऊन हा व्हिडिओ सोशल मीडियातून व्हायरलदेखील करण्यात आला. शनिवारी हा व्हिडिओ तालुकाभर व्हायरल झाला. तलवार घेऊन केलेला नाच यादवला चांगलाच अंगलट आला. पोलिसांनी या घटनेची गांभीर्याने दखल घेत तलवार जप्त केली असून तुकाराम यादववर आर्म अ‍ॅक्टअंतर्गत गुन्हा दाखल करून त्याला अटक करण्यात आली आहे. पोलीस उपनिरीक्षक विठ्ठल शेळके यांनी ही कारवाई केली.