लोकमत न्यूज नेटवर्क
जत : शेगाव (ता. जत) येथे जत ते सांगोला रस्त्यावर कंटेनरची धडक बसून झालेल्या अपघातात सुगराबी इस्माईल मुजावर (वय ६० रा. शेगाव, ता. जत) यांचा जागीच मृत्यू झाला. ही घटना शुक्रवारी सायंकाळी सहा वाजण्याच्यादरम्यान शेगावजवळ घडली. याप्रकरणी शिराज इस्माईल मुजावर यांनी जत पोलिसात फिर्याद दाखल केली आहे.
सुगराबी मुजावर या शेगाव गावालगत असलेल्या साईनगर येथील मुलीकडे गेल्या होत्या. तेथून परत येत असताना त्यांना पाठीमागून येणाऱ्या कंटेनरने (क्र. एमएच १४. जी. डी. ८७१९) जोरदार धडक दिली. यावेळी कंटेनरचे पुढील चाक अंगावरून गेल्याने त्याचा जागीच मृत्यू झाला.
अपघात घडल्यानंतर कंटेनरचालक किरण भिकाजी भगत (वय ४३, रा. देहूगाव, ता. हावेली) हा कंटेनर तेथेच सोडून भीतीपोटी पलायन करत होता. परंतु स्थानिक नागरिकांनी त्याचा पाठलाग करून पकडले. या घटनेची माहिती जत पोलिसांना देऊन पोलीस आल्यानंतर कंटेनरचालकाला त्यांच्या ताब्यात दिले. त्याच्याविरोधात जत पोलिसांत गुन्हा दाखल करण्यात आला आहे. या प्रकरणाचा पुढील तपास पोलीस हवालदार बजरंग थोरात करत आहेत.