तासगाव : किंदरवाडी (ता . तासगाव) येथील ग्रामपंचायतीवर सत्ताधारी आर. आर. आबा पाटील गटाने सत्ता कायम राखली आहे. अत्यंत चुरशीने झालेल्या निवडणुकीत आर. आर. पाटील गटाच्या श्री. सिद्धनाथ ग्रामविकास पॅनेलने सातपैकी सात जागा जिंकत विरोधी खासदार संजय पाटील गटाच्या मकाईदेवी पॅनलचा दारुण पराभव केला. विजयानंतर कार्यकर्त्यांनी फटाक्यांची आतषबाजी, गुलालाची उधळण करीत जल्लोष साजरा केला.तालुक्याचे लक्ष लागून राहिलेल्या आणि अत्यंत चुरशीने झालेल्या निवडणुकीत विरोधकांना साधे खातेही उघडता आले नाही. विजयी उमेदवारांनी आमदार सुमनताई पाटील व आमदार अनिल बाबर यांच्या मार्गदर्शनाखाली काम करणार असल्याचे सांगितले. तासगाव तालुक्यातील एकमेव किंदरवाडी ग्रामपंचायतीच्या निवडणुकीची मतमोजणी तासगाव तहसील कार्यालयात शांततेत पार पडली. विजयी उमेदवारांमध्ये हंबीरराव सूर्यवंशी, राजश्री कचरे, शोभा जाधव, गोरखनाथ सूर्यवंशी, अनिता कचरे, धोंडीराम कचरे, शारदा कचरे यांचा समावेश आहे. विजयानंतर समर्थकांनी गुलालाची उधळण करत जल्लोष केला. सत्ताधारी गटाचे नेतृत्व विठ्ठल सूर्यवंशी, सोसायटीचे अध्यक्ष रावसाहेब पाटील, माजी सरपंच शंकर सूर्यवंशी, महादेव सूर्यवंशी, भाऊसाहेब पाटील, जगन्नाथ सूर्यवंशी, सुधीर सूर्यवंशी यांनी केले.
Grampanchayat Election: आर.आर.आबांच्या लेकाचा करिष्मा कायम, भाजप खासदाराला धक्का देत एकतर्फी विजयी
By ऑनलाइन लोकमत | Published: August 05, 2022 7:27 PM