कुपवाड : कुपवाड औद्योगिक वसाहतीमधील कृष्णा व्हॅली चेंबर ऑफ इंडस्ट्रीज अँड कॉमर्सच्या पंचवार्षिक निवडणुकीत सत्ताधारी पॅनेलने सर्व बारा जागा जिंकून चेंबरवर पुन्हा आपले वर्चस्व प्रस्थापित केले. निवडणुकीनंतर झालेल्या नूतन संचालक मंडळाच्या बैठकीत अध्यक्ष म्हणून शिवाजी पाटील यांची तर उपाध्यक्षपदी उद्योजक जयपाल चिंचवाडे यांची निवड झाली.
कृष्णा व्हॅली चेंबरची ही निवडणूक चेंबरचे कुटुंबप्रमुख शिवाजी पाटील आणि उद्योजक सतीश मालू यांच्या नेतृत्वाखाली लढविण्यात आली. निवडणुकीत सत्ताधाऱ्यांविरोधात अनंत चिमड यांनी उमेदवारी अर्ज भरला होता. विरोधी गटाचे ते एकमेव उमेदवार होते. बारा जागांसाठी ही निवडणूक घेण्यात आली होती.
या निवडणुकीत सत्ताधारी गटातील विजयी उमेदवार असे : नितीश आशिष शहा (२२५), शिवाजी जोती पाटील (१८७), जयपाल दत्तू चिंचवाडे (२३०), हरी नागेंद्र गुरव (२३०), अरुण हणमंत भगत (२२९), बाळासाहेब एस. पाटील (२२६), दीपक नंदकिशोर मर्दा (२२७), रतिलाल मनजीभाई पटेल (२२०), हेमलता फुलचंद शिंदे (२२३), रमेश गुंडु आरवाडे (२३१), गुंडु विठोबा एरंडोले (२१२), सतीश नेमिचंद मालू (२२८). विरोधी गटाचे उमेदवार अनंतकीर्ती चिमड यांना ९० मते मिळाली.
निवडणूक निकालानंतर संचालक मंडळाची बैठक घेण्यात आली. या बैठकीमध्ये सर्वानुमते अध्यक्ष म्हणून कुटुंबप्रमुख शिवाजी पाटील यांची तर उपाध्यक्षपदी उद्योजक जयपाल चिंचवाडे यांची निवड करण्यात आली. तसेच सचिवपदी गुंडू एरंडोले यांची निवड करण्यात आली. निकालानंतर चेंबरच्या आवारात नूतन पदाधिकारी व उद्योजकांनी गुलालाची उधळण व फटाक्यांची आतषबाजी करत जल्लोष केला.
चौकट
अदृश्य शक्तीमुळे निवडणूक लागली...
कृष्णा व्हॅली चेंबरची यंदाची निवडणूक ऐतिहासिक अशी झाली. आमचेच मित्र अनंत चिमड यांनी निवडणुकीमध्ये विरोध केला. परंतु, ते कालही आमचे होते आणि आजही आमचेच आहेत. त्यांचा काही दोष नाही. परंतु, ही निवडणूक लागण्यामागे एक अदृश्य शक्ती काम करीत असल्याचे जाणवले. कालांतराने हे उद्योजकांच्या लक्षात येईल. उद्योजकांच्यात कोणतेही गट-तट नसतात. आम्हाला मिळालेला विजय हा उद्योजकांसाठी केलेल्या कामाची पोचपावती आहे, अशी प्रतिक्रिया निवडणूक निकालानंतर मावळते अध्यक्ष सतीश मालू यांनी व्यक्त केली.
फोटो : २० कुपवाड १
ओळ : कुपवाड एमआयडीसीतील कृष्णा व्हॅली चेंबरच्या निवडणुकीनंतर सत्ताधारी पॅनेलने गुलालाची उधळण करीत जल्लोष केला.