Maharashtra Vidhan Sabha Election 2024 ( Marathi News ) : विधानसभा निवडणुकांची घोषणा झाली असून जागावाटपाबाबत महाविकास आघाडी आणि महायुतीमध्ये बैठकांचे सत्र सुरू आहे. उपमुख्यमंत्री अजित पवार यांनी सांगली जिल्ह्यात विशेष लक्ष दिल्याचे बोलले जात आहे. जिल्ह्यातील तासगाव कवठेमहांकाळ विधानसभा मतदारसंघात घडामोडींना वेग आला आहे. आज भाजपाचे माजी खासदार संजयकाका पाटील यांनी अजित पवार यांची पक्षकार्यालयात भेट घेतली आहे. दरम्यान, आता राष्ट्रवादी शरदचंद्र पवार पक्षाच्या रोहित पाटील यांच्याविरोधात संजय पाटील यांचे सुपुत्र प्रभाकर पाटील विधानसभा निवडणूक लढणार असल्याच्या चर्चा सुरू आहेत.
माजी खासदार संजयकाका पाटील यांनी आज उपमुख्यमंत्री अजित पवार यांची मुंबईमध्ये भेट घेतली. यावेळी पाटील यांनी माध्यमांना प्रतिक्रिया दिली. संजयकाका पाटील म्हणाले, निवडणुकीबाबत सगळं चित्र उद्यापर्यंत स्पष्ट होईल. मी भाजपाच्या नेत्यांशी बोलून उपमुख्यमंत्री अजित पवार यांची भेट घेतली. आता आम्ही देवेंद्र फडणवीस यांनाही भेटायला जाणार आहे. अजून तासगाव मतदारसंघ कोणाला जाणार हे ठरलेलं नाही, दोन्ही वरिष्ठ नेते ठरवणार आहे. आज बैठक झाल्यानंतर या मतदारसंघाबाबत उद्या निर्णय देतो असं त्यांनी आम्हाला सांगितलं आहे, अशी माहिती संजयकाका पाटील यांनी दिली.
तासगाव कवठेमहांकाळ मतदारसंघातून माजी खासदार संजयकाका पाटील यांचे चिरंजीव प्रभाकर पाटील विधानसभा निवडणूक लढण्यासाठी इच्छुक आहेत. राष्ट्रवादी शरदचंद्र पवार पक्षाकडून रोहित पाटील यांना उमेदवारी मिळणार असल्याची चर्चा आहे. या मतदारसंघात यावेळी चुरशीची लढत होणार असल्याची चर्चा आहे.
प्रभाकर पाटील घड्याळ चिन्हावर विधानसभा लढणार?
तासगाव कवठेमहांकाळ विधानसभा मतदारसंघात यावेळी राष्ट्रवादी काँग्रस शरदचंद्र पवार विरुद्ध राष्ट्रवादी काँग्रेस यांच्यात लढत होणार असल्याच्या चर्चा सुरू आहेत. शरद पवार गटाकडून यावेळी रोहित पाटील रिंगणात उतरणार असल्याचे स्पष्ट आहे. तर त्यांच्याविरोधात माजी खासदार संजयकाका पाटील यांचे सुपुत्र प्रभाकर पाटील निवडणूक लढणार असल्याच्या चर्चा सुरू आहेत. प्रभाकर पाटील घड्याळ चिन्हावर ही निवडणूक लढणार असल्याचे बोलले जात आहे.
मागच्यावेळी आमदार सुमनताई पाटील यांच्याविरोधात अजितराव घोरपडे यांनी निवडणूक लढवली होती. यावेळी पक्षफुटीमुळे निवडणुकीतील समि‍करणे बदलली आहेत. यामुळे आता महायुतीमध्ये तासगाव कवठेमहांकाळ विधानसभा मतदारसंघ कोणत्या पक्षाच्या वाट्याला येणार यावर लढती ठरणार असल्याचे बोलले जात आहे.