पलूस : तृतीय पंथीयांचे हाल पाहून त्यांच्या मदतीला आमदार अरुण लाड धावून गेले. पलूस, कडेगाव, खानापूर तालुक्यातील तृतीय पंथीयांना जीवनावश्यक वस्तू दिल्या.
कोरोनामुळे तृतीय पंथीय उपेक्षित राहिले होते. त्यांना मदतीची गरज होती. आमदार लाड यांनी विविध ठिकाणी भेटी देऊन तृतीय पंथीयांच्या समस्या जाणून घेतल्या व त्यांच्यासाठी घरकुलापासून रोजगारापर्यंतच्या सर्व समस्यांवर मार्ग काढण्यासाठी प्रयत्न करू असे आश्वासन दिले. पलूस, कडेगाव, खानापूर तालुक्यातील तृतीय पंथीयांना त्यांनी जीवनावश्यक वस्तू दिल्या.
तृतीय पंथीय म्हणाले, ‘आजपर्यंत कोणत्याही राजकीय नेत्याने आम्हाला कोरोनाच्या काळात मदत केली नाही. जमीन नाही, घर नाही, भीक मागून जगणे हाच उदरनिर्वाहाचा मार्ग. परंतु लॉकडाऊनमुळे तेही बंद आहे. आमदार लाड यांनी केलेली मदत आणि दिलेला विश्वास जगण्याचे बळ देईल.
यावेळी महिला राष्ट्रवादीच्या पलूस तालुकाध्यक्षा नंदा पाटील, कडेगाव तालुकाध्यक्षा वैशाली मोहिते, राष्ट्रवादीचे कडेगाव तालुकाध्यक्ष जयदीप यादव, युवकचे विनायक महाडिक, सुरेश शिंगटे, युवती जिल्हाध्यक्षा पूजा लाड, युवती पलूस तालुकाध्यक्षा प्राजक्ता जाधव, वैभव पवार, पृथ्वीराज कदम उपस्थित होते.