सांगली : मिरज तालुक्यातील समडोळी येथे बंद बंगला फोडून चोरट्यांनी रोख १६ हजार रुपयांसह तीन किलो चांदीच्या वस्तू, सोन्याचे दागिने असा मुद्देमाल लंपास केला. याप्रकरणी अमित आण्णासाहेब भिलवडे (वय ३८, रा. सध्या पुणे) यांनी सांगली ग्रामीण पोलिसांत फिर्याद दिली आहे.
पोलिसांनी दिलेली माहिती अशी की, भिलवडे हे व्यवसायाच्या निमिताने पुणे येथे राहण्यास असतात. समडोळीतील बंगल्याची देखरेख करण्यासाठी त्यांनी सुरक्षा रक्षक नेमला आहे. मात्र, आजारी असल्याने तो सध्या तो येत नव्हता. सोमवारी सायंकाळी भिलवडे यांचे मामा आागरे यांना चोरी झाल्याचे लक्षात आले.
चोरट्यांनी बेडरूमधील लाकडी कपाटाचे लॉक तोडून चांदीचे, सोन्याचे दागिने व रोख रक्कम लंपास केली. तीन किलो चांदीच्या वस्तूमध्ये तांब्या, मीळी, चमचा, नाणी, छल्ला आदीचा समावेश आहे. त्या शिवाय सात हजार रुपयांची एक सोन्याची अंगठी, दोन वेडन आणि १६ हजार रुपये रोख रक्कम लंपास झाली आहे.
ग्रामीण पोलिसांनी घटनास्थळी पंचनामा करून पुढील तपास सुरू आहे.