जळितग्रस्त कुटुंबाच्या जखमेवर फुंकर! एकसरला मदतफेरी : ग्रामस्थांनी जमविले आठ पोती धान्य, दोन ट्रॉली चारा

 वाई : सध्याच्या स्पर्धेच्या युगात सगळीकडे स्वार्थ बोकाळून सर्वांना स्वत:पुरते पाहण्याची सवय जडली असतानाच वाई तालुक्यातील एकसर गावात संकटकाळी धावून जाण्याची सामूहिक भावना जागृत झाल्याचा प्रत्यय आला. आगीत घरसंसार उद््ध्वस्त झालेल्या कुटुंबासाठी पूर्ण गाव एकवटले आणि त्यांचा संसार सावरला. रविवारी (दि. ११) गावातील आनंदा गोळे यांच्या घराला आग लागून संपूर्ण घर भस्मसात झाले. घरातील सर्व साहित्यही खाक झाले. गोळे यांची शेती अत्यल्प. मजुरी करून घरप्रपंच चालविणारे गोळे यांनी घर बांधण्यासाठी गावातील विविध कार्यकारी सेवा सोसायटीकडून तीस हजार रुपयांचे कर्ज काढले होते. घरात भांडी-कुंडी, इतर साहित्य, धान्य भरून पुढील आयुष्याची स्वप्ने पाहत सारा सरंजाम जमवून ठेवलेला. परंतु रविवारची रात्र या कुटुंबासाठी काळरात्र ठरली. रात्री ११ वाजता सर्व कुटुंबीय टीव्हीवरचे कार्यक्रम बघत असताना घरामागची कडब्याची गंज पेटली. बघता-बघता संपूर्ण घराला आगीने वेढा घातला. प्रसंगावधान राखून सर्वजण घराबाहेर पडले; परंतु काडी-काडी करून जमविलेला संसार जळताना डोळ्यासमोर पाहण्याव्यतिरिक्त त्यांच्या हातात काहीच उरले नव्हते. सोमवारचा दिवस उजाडला, तो डोळ्यांसमोर राखेचा ढिगारा घेऊन. त्यानंतर पोलीस, तलाठी आदींनी घराचा पंचनामा केला. ग्रामस्थांनी गोळे कुटुंबीयांना मदत करण्यासाठी बैठक घेतली. गावातील सर्व तरुण आणि ग्रामस्थ बैठकीत सहभागी झाले. गोळे कुटुंबासाठी गावातून मदतफेरी काढण्याचा निर्णय झाला. तरुणांनी गावातील प्रत्येक घरात जाऊन मदतीची विनंती केली. धान्य, भांडी, कपडे, इतर वस्तू आणि चारा जमा होत राहिला. एकसरी ग्रामस्थांनी भरभरून दिले आणि अजूनही माणुसकी जिवंत असल्याचे जगाला दाखवून दिले. मदतफेरीत उपसरपंच रघुनाथ मालुसरे, तंटामुक्ती अध्यक्ष बाळकृष्ण तरडे, पोलीस पाटील लडकत, नवनाथ सणस, मुकुंदा यादव, राजेंद्र येवले, जगन्नाथ घाडगे, पांडुरंग नरडे, मधुकर चव्हाण, मनोज मालुसरे, हणमंत पवार, अशोक पाटील, महेश कळंबे, सुखदेव चव्हाण आदी तरुण व ग्रामस्थांनी सहभाग घेतला. (प्रतिनिधी)