सातारा : येथे आयोजित केलेल्या राज्य अजिंक्यपद कुस्ती स्पर्धा व महाराष्ट्र केसरी किताब लढतीसाठीचा कार्यक्रम महाराष्ट्र राज्य कुस्तीगीर परिषद, पुणेतर्फे जाहीर करण्यात आला आहे, अशी माहिती बाळासाहेब लांडगे यांनी दिली.
महाराष्ट्र राज्य कुस्तीगीर परिषदेतर्फे ६४ वी वरिष्ठ गट गादी व माती राज्य अजिंक्यपद कुस्ती स्पर्धा व महाराष्ट्र केसरी किताब लढत ५ ते ९ एप्रिल या कालावधीमध्ये श्रीमंत छत्रपती शाहू जिल्हा क्रीडा संकुलात होणार आहेत.
या स्पर्धेचा कार्यक्रम पुढीलप्रमाणे आहे. मंगळवार, दि. ५ एप्रिल रोजी पंचांचे आगमन, उजळणी वर्ग, सर्व शहर जिल्हा संघांचे आगमन, कुस्तीगीरांची वैद्यकीय तपासणी व वजने केली जातील. बुधवार, दि. ६ रोजी ५७ ते ९२ किलो वजन गटातील स्पर्धेचा बक्षीस वितरण समारंभ होईल. त्यानंतर ६१, ८६ व महाराष्ट्र केसरी गादी व माती विभाग कुस्तीगीरांचे वजन मोजमाप, वैद्यकीय तपासणी व त्यानंतर सायंकाळी ४ पासून स्पर्धा होईल.
गुरुवार, दि. ७ रोजी ६१, ८६ किलो वजनी गटातील विजेत्यांना बक्षीस वितरण होईल. त्यानंतर ७४ व ९७ किलो वजनी गटातील कुस्तीगीरांचे वजन मोजमाप, वैद्यकीय तपासणी व त्यानंतर सायंकाळी ४ वाजता स्पर्धा पार पडेल. शुक्रवार, दि. ८ रोजी ७४ व ९७ किलो वजनी गटातील विजेत्यांना बक्षीस वितरण होईल. शनिवार, दि, ९ एप्रिल राेजी अंतिम फेरी, रिपेचेस व बक्षीस समारंभ होईल, स्पर्धेच्या अनुषंगाने बंकट यादव, ललित लांडगे, दिनेश गुंड, सुधीर पवार हे नियोजन करत आहेत.
असा आहे कार्यक्रम-
५ एप्रिल : कुस्ती स्पर्धा ५७, ७० व ९२ किलो वजनी गट सायंकाळी ४ वाजता.
६ एप्रिल : ६१, ८६ वजनी गटातील कुस्ती स्पर्धा.
७ एप्रिल : ७४, ९७ किलो वजनी गटातील कुस्ती स्पर्धा.
८ एप्रिल : ६५, ७९ किलो वजनी गटातील कुस्ती.
९ एप्रिल : सायंकाळी ४ वाजता महाराष्ट्र केसरीच्या मानाच्या गदेसाठी स्पर्धा.