महावितरण बातमी
महावितरणची मुख्य लाइन अवघ्या पाच फुटांवर
देऊर येथील महावितरणचा कारभार
वाठार स्टेशन : कोरेगाव तालुक्यातील देऊर येथे गेल्या दोन वर्षांपासून मुख्य वीज वाहिनीच्या तारा जमिनीपासून अवघ्या पाच फुटांवर लटकत आहेत. शेतशिवारात लटकणाऱ्या या तारा शेतकऱ्यांसाठी मृत्यूचा सापळा बनल्या आहेत.
देऊर येथील शेखलाल नावाच्या शिवारात असलेल्या ट्रॉन्स्फॉर्मरजवळ या तारा गेल्या दोन वर्षांपासून लटकत आहेत. या धोक्याबाबत येथील शेतकरी दोन वर्षांपासून महावितरणकडे पाठपुरावा करत आहेत. मात्र, संबंधित कर्मचाऱ्यांकडून केवळ उडवाउडवीची उत्तरे दिली जात आहेत. त्यामुळे शेतकऱ्यांमधून महावितरणच्या कारभाराबाबत संताप व्यक्त केला जात आहे. वाठार स्टेशन महावितरणच्या गलथान कारभाराची चर्चा नेहमीच सुरू असते. किमान देऊर येथील धोकादायक तारा हटवून शेतकऱ्याच्या गळ्याभोवती पडलेला फास महावितरणने सोडवावा, अशी मागणी शेतकरी व्यक्त करत आहेत.
फोटो : ०१ संजय कदम
देऊर (ता. कोरेगाव) येथे एका शेतात विद्युत खांबावरील तारा धोकादायक पद्धतीने अशा लोंबकळत आहेत. (छाया : संजय कदम)